काठमाडौंको शान्ति निकुञ्ज माध्यमिक विद्यालयमा अक्सिजन सहितको आइसोलेसन केन्द्र स्थापना गरिएको छ ।

विश्वका विभिन्न मुलुकसहित नेपालमा पनि नयाँ भेरियन्टसहित दोस्रो चरणको कोरोना संक्रमण देखिएपछि नेपाली कांग्रेस काठमाडौंका नेता राजुराज जोशीको विशेष पहलमा काठमाडौं महानगरपालिका–२० स्थित शान्ति निकुञ्ज माध्यमिक विद्यालयमा बुधवारदेखि आइसोलेसन केन्द्र सञ्चालनमा आएको हो । 

शुरुमा १० शय्याको अक्सिजनसहितको आइसोलेशन केन्द्र निर्माण गरिए पनि यसै हप्तामा २० शय्याको आइसोलेशन केन्द्र निर्माण गरिने नेता जोशीले राससलाई जानकारी दिए ।

‘कोरोनाको लक्षण देखिएर घरमा बस्न समस्या पर्ने संक्रमितलाई लक्षित गरेर आइसोलेसन केन्द्र स्थापना गरेका हौं,’ उनले भने ।
 
आइसोलेसन केन्द्रमा ४ नर्सले २४ सै घण्टा सेवा प्रदान गर्नेछन् । आइसोलेसन केन्द्रको व्यवस्थापन भने काठमाडौं महानगरपालिका–२० का वडाअध्यक्ष राजेन्द्र मानन्धरको नेतृत्वमा हुनेछ ।

आइसोलेसनमा बस्ने बिरामीलाई निःशुल्क खाना, औषधि र चिकित्सकीय परामर्श दिने नेता जोशीको भनाइ छ ।