रहेनन् हिमाली सांस्कृतिक परिवारका अध्यक्ष मेनकाजी

हिमाली सांस्कृतिक परिवारका अध्यक्ष संस्कृतिकर्मी मेनकाजी गुरुङको निधन भएको छ ।

उनको उपचार क्रममा गएराति फिस्टेल अस्पताल, पोखरामा निधन भएको हो । 

उनकी पत्नी मीरा गुरुङको कोरोना संक्रमणका कारण ३० वैशाखमा निधन भएको थियो । पत्नी गुमाएको २ सातामै मेनकाजीले मृत्यु भएको हो। परिवारमा उनका १ छोरा र १ छोरी छन् । 

विश्वभर फैलिएको कोरोना महामारीको चपेटामा परेका उनी गत महिना कोरोनामुक्त भइसकेका थिए । तैपनि मुटुका रोगी मेनकाजीलाई गत साता मुटुको उपचारका लागि फिस्टेल भर्ना गरिएकोमा गएराति १ बजे निधन भएको परिवारजनले जनाएको छ । 

कास्कीको सिक्लेस स्थायी वासिन्दा भएका मेनकाजी गुरुङ पोखरा –१५, नयाँगाउँ बस्दै आएका थिए । पोखराको कला, संस्कृति संरक्षण र प्रवद्र्धनमा उनको ठूलो योगदान रहेको हिमाली सांस्कृतिक परिवारका संरक्षक नरबहादुर शेरचनले बताए । उनी लामो समयदेखि परिवारमा आबद्ध थिए ।