रुकुमपूर्वको सिस्ने गाउँपालिकाले पञ्चवर्षीय आवधिक योजना तयार गरेको छ । 

जसका लागि गत चैत ५ र ६ गते परामर्श गोष्ठी समेत सम्पन्न भएको थियो ।  

योजना निर्माणका लागि सिद्धार्थ सामाजिक विकास केन्द्र कपिलवस्तुका विज्ञ टोलीलाई जिम्मा दिइएको थियो । संस्थाले गाउँपालिकाको समग्र विकासका लागि विविध पक्ष समेटर योजना निर्माण गरेको हो । 

योजना निर्माण गर्न संयुक्त राष्ट्र संघीय जनसंख्या कोष (यूएनएफपीए) ले आर्थिक सहयोग रहेको थियो । 

आगामी आर्थिक वर्ष २०७८/७९ देखि आर्थिक वर्ष २०८२/०८३ सम्मका लागि अन्तिम रूप दिएर निर्माण गरिएको आवधिक योजनामा कृषि, पर्यटण, उद्योग प्रवद्र्धन, योग्य र दक्षजनशक्ति उत्पादन, आधारभूत स्वास्थ्य सुविधाको उपलब्धता समेटिएको गाउँपालिका अध्यक्ष कुमारी बराल (गौतम) ले जानकारी दिए ।

उनका अनुसार दीगो भौतिक पूर्वाधार विकास, जनताको पक्षमा समर्पित शासकीय प्रबन्ध, व्यक्तिको आवरणमा उच्च नैतिक प्रदर्शन र बस्तीको सौन्दर्यको सन्दर्भ लगायतका विषय गाउँपालिकाको पञ्चवर्षीय आवधिक योजनामा समेटिएको उनले बताए ।

गाउँपालिकाले यसअघि तयार गरेको गुरूयोजनामा समेटिएको विषय र पक्षलाई विश्लेषण गरी दीर्घकालीन हुने गरी केही थप लक्ष्य, उद्देश्य र रणनीति समेटेर पञ्चवर्षीय आवधिक योजना बनाइएको छ । 

‘समृद्ध सिस्ने हाम्रो गन्तव्य’ भन्ने मूल नारालाई आत्मसाथ गरी समग्र रुपमा गाउँपालिकाको विकासका लागि आवधिक योजनाले ठूलो टेवा पुग्ने अपेक्षा गरिएको छ । विकास निर्माणदेखि लिएर हरेक काम गर्दा ठोस् योजना बनाएर गरियो भने कार्यान्वयन गर्न सहज हुने भएकाले पनि गाउँपालिकाले पञ्चवर्षीय आवधिक योजना निर्माण गरेको हो ।

पूर्वाधार विकास, आर्थिक विकास, सामाजिक विकास, वातावरण तथा विपद् व्यवस्थापन, संस्थागत विकास, सेवा प्रवाह र सुशासन प्रवद्र्धन लगायतका विषयमा छलफल गरी आवधिक योजनालाई पूर्णता दिइएको हो ।