यी हुन् जसपा उपेन्द्र पक्षको कार्यकारिणी समिति बैठकका ६ प्रस्ताव

जनता समाजवादी पार्टी (जसपा)को कार्यकारिणी समितिको बैठकमा ६ वटा प्रस्ताव प्रस्तुत भएका छन् । जसपाको उपेन्द्र यादव पक्षले पार्टी कार्यालय बालकुमारीमा कार्यकारिणी समितिको बैठक बोलाएको हो । 

बैठकमा समसामयिक राजनीति, संसदीय दलको विधान अनुमोदन, संसदीय दलको निर्वाचन गराउन समिति गठन, प्रशिक्षण अभिमुखीकरण, अदालत र निर्वाचन आयोगको मुद्दाबारे अख्तियारी दिने र विविधलगायतको प्रस्ताव प्रस्तुत भएको बैठकमा सहभागी नेता इस्तियाक राईले जानकारी दिए । 

जसपाको उपेन्द्र यादव पक्षले संसदीय दलको विधान तयारी गरी अनुमोदनको लागि कार्यकारीणी समितिका पठाइसकेको छ । बैठकले सोही विधानलाई अनुमोदन गरी संसदीय दलको नेता छान्ने प्रक्रिया अघि बढाउने भएको छ । 

त्यसैगरी, जसपाको विवादमा निर्वाचन आयोगले कार्यकारीणी समितिका सदस्यहरूको हस्ताक्षर सनाखत गराउने निर्णय गरेपछि महन्थ ठाकुर समूहले त्यसलाई रोक्न माग गर्दै साउन ८ गते अदालतमा मुद्दा दर्ता गरेको छ । उक्त मुद्दाको प्रतिनिधिका लागि अख्तियारी दिने विषयमा पनि कार्यकारिणी समितिबाट निर्णय हुने बैठकमा सहभागी नेताले बताए ।