नेकपा एमालेका वरिष्ठ नेता माधवकुमार नेपालले एसएसबीको ज्यादतीका कारण नेपाली युवा महाकाली नदीमा बगेको विषयमा नेपाल र भारत दुवै सरकारले छानबिन गर्नुपर्ने माग गरेका छन् । 

आफू पक्षका विद्यार्थीहरू संगठित गरेर बनाइएको अखिल फोर्सको बृहत् भेलालाई सम्बोधन गर्दै नेपालले भने, ‘महाकाली नदीमा भएको अमानवीय घटनाको छानबिन गरियोस् । नेपाली युवा बाढीमा बगेको छ । भारतीय पक्षको लापरबाहीले नेपाली युवा बाढीमा बगेको छ । यसमा भारत सरकारले छानबिन गरोस् । नेपाल सरकारले पनि छानबिन गरोस् ।’

प्रधानमन्त्री शेरबहादुर देउवालाई छिटोभन्दा छिटो कोरोना खोप उपलब्ध गराउन पनि नेता नेपालले ध्यानाकर्षण गराएका छन् । उनले भने, ‘उहाँले खोप ल्याउने र लगाउने कामलाई प्राथमिकता दिने भन्नुभएको छ । ठूलो कुरा गर्ने, वचन दिने पूरा नगर्ने गरी नेताहरूको बानी बिग्रिएको छ । तपाईंले त्यस्तो काम नगर्नुहोस् ।’