सत्तारुढ गठबन्धनले बनाएको कार्यदलले न्यूनतम साझा कार्यक्रमको प्रतिवेदन आज बुझाएको छ । 

सरकारलाई सहयोग पुर्‍याउन बनेको कार्यदलले बालुवाटार पुगेर प्रधानमन्त्री शेरबहादुर देउवासहित गठबन्धन दलका शीर्ष नेताहरूलाई प्रतिवेदन बुझाएको कार्यदल सदस्य देव गुरूङले जानकारी दिए । 

कार्यदलले सरकार सञ्चालनका लागि न्यूनतम साझा कार्यक्रम र कार्यविधि तयार गरेको छ । प्रधानमन्त्री निवास बालुवाटारमा बिहीवार बसेको कार्यदलको बैठकले सो कार्यविधिको अन्तिम खाका तयार पारेको हो । 

नेपाली कांग्रेसका महामन्त्री पूर्णबहादुर खड्काको नेतृत्वको कार्यदलमा कांग्रेसका डा. मीनेन्द्र रिजाल र रमेश लेखक, नेकपा माओवादी केन्द्रका देव गुरुङ र वर्षमान पुन तथा जनता समाजवादी पार्टी (जसपा) नेपालका राजेन्द्र श्रेष्ठ र महिन्द्रराय यादव सहभागी छन् । 

कार्यदलले गठबन्धन सरकारको प्राथमिकता, सरकारको नीति तथा कार्यक्रम, संघीयताको कार्यान्वयनलगायत विषय समेटेर साझा कार्यक्रमको मस्यौदा तयार गरेको हो । 

न्यूनतम साझा कार्यक्रमको टुंगो लगाएपछि अब केही दिनभित्र सरकारले पूर्णता पाउने बताइएको छ ।