नेकपा एमालेले लुम्बिनी प्रदेश सभाको बैठक अवरूद्ध गरेको छ । लुम्बिनी प्रदेश सभाको नवौं अधिवेशन मंगलवारदेखि शुरू भएको छ । 

सूर्य चिन्हबाट निर्वाचित अजय शाही र बिमला वली खत्रीलाई प्रदेश सभाले पदमुक्त गर्न पत्र पठाए पनि त्यसको कुनै सुनुवाइ नभएको भन्दै बैठक अवरूद्ध गरेको हो । 

शाही पश्चिम नवलपरासी र वली दाङबाट सूर्य चुनाव चिन्हबाट निर्वाचित सांसद हुन् । वली र शाहीले संसदीय दल बाहिर गएको भन्दै कारवाही गर्न मंगलवार नै एमालेले सभामुख पूर्णबहादुर घर्तीलाई पत्र बुझाएको छ । 

एमालेले दुई जना सांसदलाई निष्कासन गर्न माग गर्दै बैठक अवरुद्ध गरिएको प्रमुख सचेतक भूमिश्वर ढकालले जानकारी दिए । शुरूमै एमाले सचेतक ढकालले शाही र वलीलाई पदमुक्त नहुँदासम्म बैठक चल्न नसक्ने बताए । 

उता सभामुख पूर्णबहादुर घर्तीले प्रदेश प्रमुख अमिक शेरचनबाट आएको पत्र पढेर सुनाइरहे । एमाले सांसदहरू भने उठेर टेबल बजाइरहेका थिए । 

अवरोधका बीच सभामुख घर्तीले प्रदेश प्रमुखबाट प्राप्त भएको प्रदेशसभाको अधिवेशन आह्वानसम्बन्धी पत्र पढेर सुनाएका थिए । त्यस्तै मन्त्रिपरिषद् गठन र कार्यविभाजनसम्बन्धी पनि पढेर सुनाएका थिए । 

सभामुखले पत्र पढिसकेपछि पनि एमाले सांसदले उठेर बैठक चल्न नदिएपछि बैठक स्थगित भएको हो । प्रदेशको नवौं अधिवेशनको दोस्रो बैठक बुधवारसम्मका लागि स्थगित भएको छ ।