वरिष्ठ नेता माधव नेपाललगायत केही नेताले नयाँ पार्टी खोलेपछिको अवस्थाको समीक्षा गर्न नेकपा एमाले स्थायी कमिटीको बैठक मंगलवार बस्दैछ ।

तुलसीलाल स्मृति प्रतिष्ठानको कार्यालय च्यासलमा बिहान ११ बजेपछि बस्ने बैठकमा माधव नेपालको साथ छाडेका स्थायी कमिटी सदस्यहरू सहभागी हुँदैछन् । 

१० बुँदे सहमति कार्यान्वयन र पार्टीलाई जेठ २ को अवस्थामा फर्काउनु पर्ने माग राख्दै आएका स्थायी कमिटी सदस्यहरू सहभागी हुन लागेका हुन् । 

अध्यक्ष केपी शर्मा ओलीको बालकोटस्थित निवासमा सोमवार भएको छलफलमा पार्टीलाई जेठ २ को अवस्थामा फर्काउने सहमति भएको थियो । 

सहमतिसँगै उपाध्यक्षत्रय भीम रावल, युवराज ज्ञवाली र अष्टलक्ष्मी शाक्य, उपमहासचिव घनश्याम भुसाल तथा सचिवत्रय गोकर्ण विष्ट, योगेश भट्टराई र भीम आयार्च मंगलवारको बैठकमा सहभागी हुँदैछन् । 

स्थायी कमिटी सदस्य रघुजी पन्त, असुशासन आयोगका अध्यक्ष अमृत बोहोरा पनि आजको बैठकमा सहभागी हुँदैछन् । 

मंगलवारको बैठकमा पूर्वमाओवादी खेमाका रामबहादुर थापा, टोपबहादुर रायमाझी, लेखराज भट्ट लगायत पनि सहभागी हुँदैछन् । सर्वोच्च अदालतको फैसलाले नेकपा एमाले ब्यूँतिएपछि आज पहिलो पटक सबै पदाधिकारीसहितको बैठक बस्न लागेको हो ।