कांग्रेसको संस्थापन इतर समूहले साझा उम्मेदवार लिएर महाधिवेशनमा जाने घोषणाको तयारी गरेको छ ।

आज सानेपामा पत्रकार सम्मेलन गरेर महाधिवेशनमा संस्थापन इतरको साझा उम्मेदवार बनाउने घोषणा गर्न लागेको हो ।

संस्थापन पक्षसँग असहमत रहेको वरिष्ठ नेता रामचन्द्र पौडेल पक्षले अहिलेसम्म साझा उम्मेदवार तय गर्न भने सकेको छैन । 

‘महाधिवेशनमा संस्थापन इतर समूहको साझा उम्मेदवार हुन्छ भन्ने घोषणा गर्न लागेको हौ । वडा अधिवेशन शुरू हुनु अगाडि यो जानकारी गराउन पनि आवश्यक हुन्छ । तर, अहिल्यै को उम्मेदवार हुने भन्ने टुंगो लागेको छैन’, केन्द्रीय सदस्य एवं पौडेल समूहमा रहेका नेता बलबहादुर केसीले भने । 

संस्थापन इतरमा रामचन्द्र पौडेल, शशांक कोइराला, शेखर कोइराला, प्रकाशमान सिंहले सभापतिको दावी गरिरहेका छन् । 

भदौ १६ मा बत्तिसपुतलीस्थित अनुप फुडल्याण्डमा भएको उनीहरूको वार्ता विना निष्कर्ष टुंगिएको थियो । उक्त छलफलमा पौडेलले एक पटक आफूलाई सभापति उम्मेदवारीका लागि छाडिदिन अरू आकांक्षीलाई आग्रह गरेका थिए ।