नेपाली कांग्रेसको १४औँ महाधिवेशन नजिकिँदै गर्दा नेताहरूको दौडधुप तीव्र बनेको छ । केन्द्रदेखि प्रदेश हुँदै जिल्ला र वडा तहसम्म नेतृत्वका आकांक्षीहरूले दौडधुप बढाएका हुन् ।

कांग्रेसको उर्बरभूमि मानिएको मोरङमा जिल्ला नेतृत्व हत्याउनका लागि नेताहरू बालुवाटारदेखि पार्टीका क्रियाशील सदस्यको घरदैलोसम्म धाउन थालेका छन् ।

कांग्रेस मोरङको सभापतिका लागि मात्रै आधादर्जन भन्दा धेरै आकांक्षीहरू देखिएका छन् । 

डिकबहादुर लिम्बू, दिलिप गच्छदार, नागेश कोइराला, रमेशजंग रायमाझी, मानबहादुर लिम्बू, यदु विष्ट, मदन संग्रौला, मोदराज घिमिरे, निरञ्जन रिजाललगायत नेताहरूको नाम चर्चामा रहेको छ । 

१३ औँ अधिवेशनमा देउवा प्यानलबाट जिल्ला सभापतिमा जितेका डिकबहादुर लिम्बू यसपटक भने शेखर कोइराला प्यानलबाट उठ्ने तयारीमा छन् ।

हाल जिल्ला सचिव रहेका नागेश कोइराला, संगठन विभाग प्रमुख मानबहादुर लिम्बू, ६ नम्बर क्षेत्रीय सभापति निरञ्जन रिजाल विशेष गरी नेता डा. शेखर कोइरालानिकट मानिएका छन् । अर्कातर्फ रमेशजंग रायमाझी र दिलिप गच्छदार शेरबहादुर देउवानिकट मानिएका छन् । 

यदु विष्टलाई गुरुराज घिमिरे, मोदराज घिमिरेलाई मिनेन्द्र रिजाल र मदन संग्रौलालाई कृष्णप्रसाद सिटौलासँग नजिक मानिन्छ ।

धेरै जनाको नाम आएपनि संस्थापन पक्ष र कोइराला पक्ष भएर चुनावी मैदानमा जाने निश्चित रहेको जिल्लास्तरका एक नेताले बताए ।

उनले भने, ‘सभापति लड्ने प्रचार गरेर जिल्ला सदस्य मात्रै लिने साथीहरू पनि हुनुहुन्छ ।’ 

१३ औँ अधिवेशनमा देउवा पक्षबाट सभापति भएका डिकबहादुर लिम्बू यसपटक भने कोइराला प्यानलमा आएका छन् । लिम्बू कोइराला प्यानलमा आएपछि कोइराला पक्षका नेतालाई सभापतिको उम्मेदवार छान्न मुस्किल परेको छ ।

देउवा पक्षबाट भने उम्मेदवारको टुंगो लागिसकेको देउवा निकटका नेताहरू बताउँछन् । दिलिप गच्छदार र रमेशजंग रायमाझीमध्ये दिलिप नै दर्बिलो उम्मेदवार भएको एक नेताले बताए ।

दिलिप कार्यकर्ताको घरमा दौडिरहेका छन् । उनी यसअघि पार्टीको जिल्ला उपसभापति र  श्रम राज्यमन्त्री समेत भइसकेका हुन् । रायमाझी राष्ट्रिय सभा सदस्य हुन् । 

डिकबहादुरले भने प्रदेशको सभापतिमा समेत बल गरिरहेका छन । प्रदेशको राजधानी भएको नाताले प्रदेश सभापति उम्मेदवारी स्वभाविकै नै हुने उनी बताउँछन् ।

लिम्बूले आदिवासी जनजाति कोटाबाट केन्द्रीय सदस्य समावेशी सह–महामन्त्री लागयतका पदमा समेत च्याँखे थाप्ने संकेत गरेका छन् ।

सभापति लिम्बू प्रजातान्त्रिक कांग्रेस छँदा जिल्ला सभापति रहेका थिए । 

उनी रामचन्द्र पौडेल (विशेष गरी कोइराला परिवार) पक्षमा आउनुमा नोबेल मेडिकल कलेज सञ्चालक तथा मोरङ ३ को चुनावमा पराजित उम्मेदवार सुनिल शर्माको हात रहेको बताइन्छ ।

शर्माले गाडी समेत किनिदिएको चर्चा कांग्रेस वृत्तमा छ ।

शर्माले मोरङ क्षेत्र नम्बर ३ का महासमिति सदस्य समेत रहेका महेन्द्र सुवेदीलाई पनि गाडी किनिदिएको चर्चा छ । उनी पनि पौडेल पक्षमा लागेका छन् ।

शर्मा कोइराला परिवारका विश्वास पात्र मानिन्छन् ।