नेकपा क्रान्तिकारी माओवादीका नेता सीपी गजुरेलले नेपाललाई सिरिया बन्न नदिन आफूहरूले एमसीसीको विरोध गरेको बताएका छन् । एमसीसी पारित भयो भने नेपाल शक्ति केन्द्रको रणभूमि बन्ने खतरा रहेको बताएका हुन् । 

नेत्रविक्रम चन्द विप्लव नेतृत्वको नेकपाले सोमवार काठमाडौंमा आयोजना गरेको कार्यक्रमलाई सम्बोधन गर्दै गजुरेलले एमसीसी खारेज नभएसम्म संघर्ष गर्ने बताएका हुन् । 

‘सहयोग चाहिँदैन भन्दाभन्दै सहयोग लिन दबाब दिनुको पछाडिको उद्देश्य के हो ? नेपाललाई अर्को सिरिया बनाउन खोजिएको छ, हामी सिरिया बन्न दिँदैनौँ,’ गजुरेलले भने । 

नेपालमा अमेरिका आएर चीनसँग युद्ध गर्दा नेपालको अस्तित्व मेटिने उनले चेतावनी दिए । ‘चिनियाँ राष्ट्रपति सीले नेपालमा आएको बेला आफ्नाविरुद्ध गतिविधि गर्नेको हड्डी भाँचिदिने चेतावनी दिएका थिए, यदि नेपालमा आएर चीन विरोधी गतिविधि भए भने के होला ?,’ गजुरेलले प्रश्न गरे ।

एमसीसीकै कारण नेपालमा नयाँ कम्युनिस्ट ध्रुवीकरणको सम्भावना रहेको उनले बताए ।