दक्षिण कोरियामा कोरोना भाइरसको संक्रमण फेरि ह्वात्तै बढेको छ ।

कोरिया रोग नियन्त्रण तथा रोकथाम विभागका अनुसार शनिवार नयाँ संक्रमितको संख्या ३ हजार २७३ पुगेको छ । 

यससँगै कोरियामा दैनिक संक्रमितको संख्या पहिलो पटक ३ हजार नाघेको छ ।

कोरियामा गत सोमवारदेखि कोरियन दशैं (छुसक) को ३ दिने बिदा थियो । यो बेला मानिसको अत्यधिक चहलपहल भयो । त्यसैले पनि यो अवस्था आएको अनुमान गरिएको छ ।

सरकारले उक्त समयमा सामाजिक दूरीको नियमलाई समेत हल्का खुकुलो बनाएको थियो ।

बिदाका अवसरमा लाखौं मानिस आफ्नो कार्यस्थलबाट घर फर्किएकाले संक्रमितको संख्या बढेको छ । संक्रमणकै कारण कोरोना परीक्षण गर्नेको लाइन पनि लामो हुने गरेको छ ।

शुक्रवारको तुलनामा शनिवार कूल संक्रमितको संख्या ८३९ जनाले बढी हो । शनिवार थपिएका कूल संक्रमितमध्ये ३ हजार २४५ स्थानीय संक्रमित छन् भने बाँकी बाहिरबाट संक्रमित भई आउने छन् ।

कोरोना संक्रमितको संख्या बढ्नेक्रमसँगै सरकारले खोप कार्यक्रमलाई पनि तीव्र गतिमा अगाडि बढाएको छ । हालसम्म ७० प्रतिशतभन्दा धेरैले पहिलो मात्राको खोप लगाइसकेका छन् भने दुवै मात्रा लगाउनेको संख्या ४२ प्रतिशत नाघेको छ ।

सरकारले २ मात्राबीचको समयावधिलाई समेत छोट्याउनाका साथै दोस्रो मात्राको कार्यक्रमलाई समेत तीव्र पार्ने बनाएको छ ।