नेपाली कांग्रेसका नेता प्रकाशमान सिंहले तोकिएको समयमै पार्टीको महाधिवेशन गर्नुपर्ने बताएका छन् । 

सरोज ग्रामीण सेवा केन्द्र कचनवन महोत्तरीको आयोजनामा शहीद सरोज कोइरालाको ४८औं पुण्यतिथिको कार्यक्रममा सहमागी हुन आएका नेता सिंहले आज जनकपुरधाम विमानस्थलमा सञ्चारकर्मीसँग कुराकानी गर्दै उनले पार्टी नेतृत्व र पदाधिकारीले महाधिवेशन गर्न ढिलाइ गरिरहेको आरोप लगाए । 

‘चार पटक मिति तोकेर पनि महाधिवेशन समयमा नभए पार्टीकै लागि भए पनि राम्रो हुँदैन,’ उनले भने, ‘क्रियाशील सदस्यतामा केही विवादै नगर्नुपर्ने तथा विधि र नियमअनुसार दिनुपर्नेमा नदिई समितिमाथि समिति गठन गर्दै आएको छ ।’

नेता सिंहले आफू आसन्न १४औं महाधिवेशनमा पार्टी सभापतिको उम्मेदवार बन्ने दाबी गर्दै मंसीर ९ गतेदेखि तोकिएको महाधिवेशन सोही मितिबाट प्रक्रिया शुरू गर्नुपर्ने बताए । रासस