गोदावरी नगरपालिकाले उपमेयर कप राष्ट्रिय महिला लिग छनोट प्रतियोगितामा पहिलो जीत दर्ता गराएको छ ।

सातदोबाटोस्थित एन्फा कम्प्लेक्समा सोमवार भएको खेलमा महालक्ष्मी नगरपालिकालाई ५–३ गोल अन्तरले पराजित गर्दै गोदावरीले पहिलो जीत दर्ता गराएको हो ।

गोदावरीको जीतमा दावा डोल्मा लामा र एस्थर तामाङले २/२ गोल गरिन् भने यान्जोम रोकायाको नाममा १ गोल रह्यो ।
    
महालक्ष्मीकी कप्तान सरु राईले २ र पूजा लामाले १ गोल गरिन् । जीतसँगै गोदावरीले ३ खेलमा ३ अंक जोड्यो । महालक्ष्मीको यो लगातार तेस्रो हार हो ।

समूह ‘ए’मा रहेका दुवै टोली बाहिरिसकेका छन् । प्रतियोगितामा ३१ टोलीले प्रतिस्पर्धा गरिरहेका छन् ।

सहभागी टोलीलाई एन्फाले विभिन्न १० समूहमा विभाजन गरेको थियो । प्रतियोगिताको विजेता र उपविजेता टोली राष्ट्रिय लिगमा छनोट हुनेछन् ।

प्रतियोगिताको विजेता टोलीले ५ लाख तथा उपविजेताले ३ लाख पाउने छन् ।