माधव नेपाल लगायत १४ सांसदलाई पदमुक्त गर्न दिएको पत्र सभामुखले कार्यान्वयन नगरेको भन्दै नेकपा एमालेले बिहीवार पनि प्रतिनिधि सभाको बैठक अवरुद्ध गरेको छ ।

दशैं बिदाका कारण लामो अन्तरालपछि बसेको प्रतिनिधि सभा बैठकमा एमालेले ‘संसदीय मर्यादा कायम गर’ भन्दै नाराबाजी गरेको हो । सभामुख अग्नि सापकोटाले बैठक शुरू भएको घोषणा गर्नासाथ एमाले सांसदहरु वेलमा आएर नाराबाजी गरेका थिए । 

एमालेले नाराबाजी गरेपछि सभामुख सापकोटाले बाढी पीडितको लागि राहतका लागि समसामयिक विषयमा ध्यानाकर्षण गराउनको लागि संसद संचालनमा सहयोग पुर्‍याउन आग्रह गरे । भदौ २३ गते प्रतिनिधि सभाको अधिवेशन शुरू भएको दिनदेखि एमालेले संसदमा अवरोध गरिरहेको छ ।