केही महिनापछि सम्मानजनकरूपमा राजीनामा दिएर बाहिरिने प्रधानन्यायाधीश चोलेन्द्र शमशेर जबराको प्रस्ताव न्यायाधीशहरूले अस्वीकार गरेका छन् ।

न्यायाधीशहरूका तर्फबाट गठित वार्ता टोलीले उक्त प्रस्ताव स्वीकार्य नभएको जानकारी प्रधानन्यायाधीश जबरालाई गराएको स्रोतले लोकान्तरलाई जानकारी दियो ।

प्रधानन्यायाधीशले तत्काल मार्गप्रशस्त गर्नुपर्ने पक्षमा रहेका न्यायाधीशहरू आज इजलासमा समेत बसेका छैनन् ।

सोमवार बन्दी प्रत्यक्षीकरणको मुद्दा मात्र हेरेका न्यायाधीशहरू प्रधानन्यायाधीशको प्रस्तावमा असहमति जनाउँदै मंगलवार इजलासमा समेत नबसेका हुन् ।

बन्दीका मुद्दा मात्र पेशीमा चढाउने पूर्व सहमतिविपरीत जबराले बैंकिङ कसूरको मुद्दा पनि पेशीमा चढाएका थिए ।

दीपककुमार कार्की र प्रकाशमान सिंह राउतको संयुक्त इजलासमा बन्दी प्रत्यक्षीकरण, मीरा खड्का र हरिकृष्ण कार्कीको संयुक्त इजलासमा एउटा बन्दी प्रत्यक्षीकरण र ४ वटा बैंकिङ कसुरको मुद्दा राखिएको थियो ।

त्यसबाहेक बमकुमार श्रेष्ठ र कुमार चुडालको संयुक्त इजलासमा बन्दी प्रत्यक्षीकरणको १ थान मुद्दा, तेजबहादुर केसी र कुमार रेग्मीको संयुक्त इजलासमा बन्दी प्रत्यक्षीकरणकै १ थान मुद्दा, प्रकाशकुमार ढुंगानाको एकल इजलासमा बन्दी प्रत्यक्षीकरणको १ थान मुद्दा र सुष्मालता माथेमाको एकल इजलासमा बन्दी प्रत्यक्षीकरणको १ थान मुद्दा राखिएको थियो ।

अहिले न्यायाधीशहरूबीच बैठक चलिरहेको छ ।