राप्रपा अध्यक्ष कमल थापाले मुलुकले एमाले अध्यक्ष केपी शर्मा ओलीबाट देशले साहसिक निर्णयको अपेक्षा गरिएको बताएका छन् । 

उनले एमाले अध्यक्ष केपी ओलीको नेतृत्वमा लिम्पियाधुरा समेटिएको नक्शासहित नेपाली भूमिको रक्षा गर्न सकेको भन्दै प्रशंसा गरे । 

चितवनमा शुरू नेकपा एमालेको दशौं महाधिवेशनको उद्घाटन समारोहमा मन्तव्य राख्दै थापाले पहिलो पटक प्रधानमन्त्री बन्दा प्रंशसनीय काम गरे पनि दोस्रोपटक गर्न नसकेको टिप्पणी गरे ।

‘केपी ओलीको सुझबुझ र मार्गदर्शनमा रहेर हामीले राष्ट्रिय स्वाभिमानमा एक इन्च आँच आउन नदिई नाकाबन्दीलाई परास्त गरेका थियौँ, चीनसँग व्यापार पारवहन सन्धी गर्न सफल भयौं,’ थापाले भने, ‘पार्टीभित्रको कलहका कारण पनि होला दोस्रो पटक प्रधानमन्त्री बन्दा सरकारले जनतालाई दिएको आश्वासनअनुसार काम गर्न सकेन । धेरै विरोधाभाष र असफलताबीच दुईवटा राम्रा काम भएका छन्, मधेसमा देखा परेको पृथकतावादी आन्दोलन र विप्लवको पार्टीलाई मूलधारमा ल्याउने काम भएको छ ।’

प्रधानमन्त्री रहेका समयमा ओलीको नेतृत्वमा लिम्पियाधुरा समेटेर आफ्नो सीमाको रक्षाको प्रतिबद्धता गरेको थापाले टिप्पणी गरे ।