नेकपा एमालेका सचिव गोकर्ण विष्टले विधान संशोधनमार्फत पदाधिकारी थप गरेर भएपनि सर्वसम्मत नेतृत्व चयन गर्नुपर्ने प्रतिनिधिको भावना रहेको बताएका छन् । दशौं महाधिवेशनलाई एकताको महाधिवेशन बनाउन नेतृत्वमा सहमति जरुरी रहेको उनले बताए । 

शुक्रवार राति चितवनको सौराहामा पत्रकारहरुसँग कुरा गर्दै विष्टले कसले उम्मेदवारी घोषणा गरे भन्ने विषय गौण भएको बताएका हुन् । ‘केही संख्या थपेर भएपनि सहमति गरौं भन्ने सुझाव आएको छ । केन्द्रीय कमिटीले के निर्णय गर्छ भनेर मैले अहिलै भन्न सक्दिन,’ विष्टले भने । 

एमाले केन्द्रीय कमिटीको बैठक शुक्रवार राति सौराहामा बस्दैछ । राति ९ बजेसम्म बैठक शुरु भएको छैन । भीम रावलले अध्यक्षमा उम्मेदवारी दिने घोषणा गरेको सम्बन्धमा सोधिएको प्रश्नमा सचिव विष्टले आफूहरुसँग कुनै छलफल नभएको बताए । ‘को को साथीहरुले कहाँ के घोषणा गर्नु भएको छ, तपशीलको विषय हो । हामी सर्वसम्मत नेतृत्व चयन गर्नुपर्छ भनेर लागेका छौं’ उनले भने ।

सचिव विष्टले अहिलेसम्म आफूले महाधिवेशनमा कुन पदमा लड्ने भनेर निर्णय लिइ नसकेको बताए । ‘मैले आवस्यक परेको अवस्थामा घोषणा गर्नेछु । महाधिवेशनले उपयुक्त जिम्मेवारी दिनेछ भन्ने कुरा विश्वास छ, आवस्यकता पर्दा घोषणा गर्छु’ पत्रकारहरुको जिज्ञासामा विष्टले भने । 

एमालेको बन्द शत्र शनिवार बिहान चितवनको सौराहामा शुरु हुँदैछ । चितवनको नारायणगढमा शुक्रवार दिउसो एमालेको दशौं महाधिवेशन उद्घाटन भएको थियो । 

उपाध्यक्ष भीम रावलले अध्यक्षमा उम्मेदवारी दिने बताएपछि एमालेमा सर्वसम्मतिमा नेतृत्व चयन गर्ने विषय पेचिलो भएको छ । शुक्रवार राति सौराहामा पत्रकारसँग कुरा गर्दै रावलले प्रतिष्पर्धामा लागि आफू तयार रहेको र भोलि उम्मेदवारी दिने बताएका छन्  ।

रावलले पदाधिकारीको संख्या थप गर्ने विषयमा पार्टीमा औपचारिक छलफल शुरु नभएको बताए ।