बिहान १० बजे शुरू हुने भनिएको नेकपा एमालेको दशौं अधिवेशनको बन्दशत्र १२ घण्टा ढिलो गरी शुरू हुँदैछ ।

चितवनको सौराहामा आइतवार राति १० बजेदेखि बन्दशत्र शुरू गर्ने तयारी छ । यसअघि राति ८ बजेदेखि गर्ने भनिएकोमा पौने १० बजेसम्म शुरू भएको छैन । 

बन्दसत्रमा अध्यक्ष मण्डलका अध्यक्ष केपी शर्मा ओलीले पदाधिकारी र केन्द्रीय सदस्यको सूची प्रस्ताव गर्ने तयारी गरेका छन् ।

अन्य पदाधिकारीमा सहमति भएपनि वरिष्ठ उपाध्यक्ष र महासचिवमा सहमति जुट्न सकेको छैन । ओली बसेको होटलको लवीबाट केन्द्रीय सदस्यको संशोधित सूची विष्णु पौडेलले प्रिन्ट गरेर माथि लगेका छन् । 

शनिवारको बन्दसत्रले सहमतिको सूची ल्याउने अधिकार ओलीलाई दिएको थियो ।

नयाँ नेतृत्व चयन गर्दै एमालेको महाधिवेशन आजै समापन गर्ने तयारी छ । आज महाधिवेशन सकिएमा भोलि सौराहामा घोषणा सभामार्फत नयाँ नेतृत्वको शपथ गराउने तयारी छ । 

सहमतिका लागि ओलीले पेश गर्न लागेको सूचीप्रति भीम रावलले आपत्ति जनाएका छन् । व्यक्तिले नेतृत्व चयन गर्ने व्यबस्था पार्टी विधान विपरित भन्दै रावलले निर्वाचनबाट नेतृत्व चयन गर्नुपर्ने बताएका छन् । 

ओलीको प्रस्तावमा सहमति नभएमा निर्वाचन प्रक्रिया शुरू हुनेछ । निर्वाचन प्रक्रियामा गएमा महाधिवेशन लम्बिने नेताहरूले बताएका छन्।