नेकपा एमालेको १०औं राष्ट्रिय महाधिवेशनमा अध्यक्ष पदमा उम्मेदवारी दिएका नेता भीम रावलको नाम केन्द्रीय सदस्यको सूचीमा भेटिएको छ ।

केन्द्रीय निर्वाचन आयोगले बिहान ४ बजेपछि मतदान शुरू गर्दा उम्मेदवार रावलले विद्युतीय मशिनमा मतदान गरेका छन्, उनले आफ्नो नाम अध्यक्ष र केन्द्रीय सदस्य दुवैतिर भेट्टाएपछि अनौठो मानेका छन् ।

मतदान गरिसकेपछि सञ्चारकर्मीलाई प्रतिक्रिया दिँदै रावलले आफूले केन्द्रीय सदस्यमा उम्मेदवारी नै नदिएकोमा केन्द्रीय सदस्यमा नाम आउनु गलत भएको बताए ।

अध्यक्षका उम्मेदवार रावलले पदाधिकारीका उम्मेदवारहरूको नाम केन्द्रीय सदस्य पदमा समेत रहेकाले तत्काल सच्याउन निर्वाचय आयोगलाई आग्रह गरेका छन् । ‘म सदस्यको उम्मेदवार होइन, यसले मतदाता प्रतिनिधिलाई समस्या पर्छ,’ रावलले भने ।

यसअघि अध्यक्ष केपी शर्मा ओलीले महाधिवेशनको बन्दसत्रमा प्रस्ताव गरेको केन्द्रीय कमिटीमा रावलको नाम केन्द्रीय सदस्यमा रहेको थियो ।