राष्ट्रिय खेलकुद परिषद् (राखेप) का नवनियुक्त सदस्यसचिव टंकलाल घिसिङले नेपाली खेलकुदलाई माथि उठाउन कुनै कसर बाँकी नराख्ने बताएका छन् ।

राखेपअन्तर्गत तालिम तथा प्रशिक्षण विभागले बिहीवार सातदोबाटोस्थित अन्तर्राष्ट्रिय खेलकुद परिसरमा विभिन्न २२ खेलका मुख्य प्रशिक्षकको उपस्थितिमा भएको छलफल कार्यक्रममा सदस्यसचिव घिसिङले सो कुरा बताएका हुन् ।

‘नेपाली खेलकुदलाई अझ माथि उठाउन कुनै कसर बाँकी राख्दिनँ । हरदम त्यसैमा प्रयासरत रहने छु । रग्वीलाई पनि शून्यकै अवस्थाबाट माथि उकास्न हरदम प्रयास गरिरहे र सफल पनि भएँ । त्यही अनुभवलाई प्रयोग गर्दै अगाडि बढ्छु,’ सदस्य सचिव घिसिङले भने ।

उनले सर्वाधिक पदकको सम्भावना भएका खेललाई पहिलो प्राथमिकतामा राखेर योजना अगाडि बढाउने बताउँदै बाँकी खेल पनि प्राथमिकताकै सूचीमा पर्ने धारणा व्यक्त गरे ।

‘मेरा लागि सबै खेल समान हुन् । तैपनि पदकको सर्वाधिक सम्भावना भएकालाई पहिलो प्राथमिकतामा राखेर अगाडि बढ्छु । त्यसको अर्थ बाँकी खेल प्राथमिकतामा पर्दैनन् भन्ने चाहिँ कदापी होइन,’ उनले भने ।

उनले खेलाडी छनोट निष्पक्ष र पारदर्शी नहुञ्जेल जति लगानी गरे पनि बालुवामा पानी हाले जस्तो मात्र हुने बताउँदै यसमा सम्बन्धित संघ र प्रशिक्षकले विशेष ध्यान दिन आवश्यक रहेको बताए । उनले प्रशिक्षकहरूलाई समयसापेक्ष परिस्कृत र स्तरवृद्धि गर्न ‘रिफ्रेस कोर्स’ अतिआवश्यक भएको बताउँदै त्यसका लागि विदेशी प्रशिक्षक झिकाएर वा प्रशिक्षकलाई विदेशमा पठाएर हुने र आवश्यक कदम चालिने बताए ।

‘नतिजा मात्र खोज्नुभन्दा पनि कसरी राम्रो नतिजा आउँछ त्यसका लागि उपयुक्त योजना आवश्यक रहेको छ,’ उनले भने । पदभार ग्रहण गर्दै सहकार्यमा जोड दिएका सदस्य सचिव घिसिङले सरोकारवालासँग सहकार्य गर्दै अगाडि बढ्न सदैव तयार रहेको बताउँदै खेलाडी र खेलकुदको हितमा हुने राम्रो सल्लाह सुझावलाई आत्मसात गर्दै अगाडि बढ्ने प्रतिबद्धता जनाए ।

तालिम तथा प्रशिक्षण विभागका निर्देशक अर्जुन विक र उपनिर्देशक हिमाल दाहालले विगतमा बृहत् राष्ट्रिय खेलकुदमा समावेश भएका खेललाई लक्षित गरी नवौं राष्ट्रिय खेलकुदमा सहभागी हुने खेलाडी, प्रशिक्षक, टीम व्यवस्थापक, निर्णायक संख्या लगायतबारे अनुमानित खाका प्रस्तुत गरेका थिए ।

मुख्य प्रशिक्षकले खेल सामाग्री, पूर्वाधार, खेलाडीको प्रशिक्षण लगायतका अवस्थाबारे सदस्य सचिव घिसिङलाई अवगत गराएका थिए ।