नेपाल कम्युनिष्ट पार्टी (माओवादी केन्द्र) प्रदेश १ को अधिवेशन रोचक बनेको छ ।

एक साता बित्न लाग्दा समेत नेतृत्व चयन गर्न नसकेको माओवादीमा पहिलेका आकांक्षीले दाबी छाडे पनि अहिले अध्यक्षसहित पदाधिकारीमा दाबी गर्नेको संख्या दिनदिनै बढ्न थालेको छ ।

२७१ सदस्यीय कार्यसमिति चयन गरे पनि विवादका कारण पदाधिकारी चयन हुन सकेको छैन ।

यसअघि अध्यक्षको दाबी गरिरहेका केन्द्रीय सदस्यहरू सुरेशकुमार राई (हिमाल), इन्द्रबहादुर आङ्बो (मौसम) र हेमराज भण्डारीले आफ्नो दाबी छाडेपछि अन्य नेताहरूले धमाधम दाबी पेश गरिरहेका छन् ।

प्रदेश समितिको बुधवार बसेको पहिलो बैठकमा तीनैजनाले प्रदेश समितिमा नरहने घोषणा गरेपछि केन्द्रीय सदस्यबाहेक नेताहरूलाई प्रदेशको नेतृत्व गर्ने बाटो खुलेको हो ।  

अहिलेसम्म अध्यक्षमा दाबी गर्नेहरूको संख्या ६ पुगेको छ । जसमा पाँचथरका हर्कबहादुर लावती (मिक्सो), सुनसरीका शिवकुमार डाँगी र मुक्साहाङ मेन्याङ्बो (मुकेश), उदयपुरका मोहनबहादुर खत्री (हेनरी), झापाका मणिकुमार साम्पाङ र विराटनगरका हेम कार्की (विशाल) रहेका छन् । दाबी गर्नेको संख्या अझै बढ्न सक्ने प्रदेशका नेताहरू बताउँछन् । 

माओवादीले नेतृत्व चयनका लागि भन्दै आगामी पुस ७ गतेलाई कार्यसमितिको बैठक आह्वान गरेको छ ।

उक्त बैठकमा पदाधिकारीको चयनबारे सुझाव दिन भन्दै प्रदेश १ माओवादीका सह–इञ्चार्ज तथा केन्द्रीय सदस्य अजम्बर काङमाङको नेतृत्वमा ५ सदस्यीय कार्यदल निर्माण गरिएको छ ।

कार्यदलका अन्य सदस्यहरूमा सुरेशकुमार राई (हिमाल), इन्द्रबहादुर आङ्बो (मौसम), हेमराज भण्डारी र केन्द्रीय सदस्य रामकुमारी चौधरी रहेका छन् ।

यसबीचमा उनीहरूले आकांक्षीलाई मिलाउने प्रयास गर्ने बुझिएको छ ।

उपाध्यक्षमा खोटाङका ध्रुव बुढाथोकी (धिरेन), झापाका सीपी कडरिया र विराटनगरका भोगेन्द्र यादवले दाबी प्रस्तुत गरेका छन् ।

महिला उपाध्यक्षका लागि संखुवासभाकी इन्दिरा मिश्र (चेतना) र मोरङकी विनिता घिमिरे (सामना) प्रतिस्पर्धी छन् ।  

सचिवमा मोरङका गणेश उप्रेती (सुशील), ओखलढुंगाका मोहनकुमार खड्का (हिमशिखर) र सुनसरीका आइन्द्रविक्रम बेघाले दाबी गरेका छन् । 

सह–सचिवमा आकांक्षा राख्नेको संख्या धेरै भएपनि अहिलेसम्म सोलुखुम्बुका ठमनाथ पराजुली (ध्रुव)ले मात्रै सार्वजनिक गरेका छन् । कोषाध्यक्षमा भने सुनसरीका मदन चुडालले दाबी गरेका छन् । 

कात्तिक २५ गते मोरङको विराटचोकमा अधिवेशन शुरू भएको थियो । आकांक्षीहरू धेरै भएपछि  पदाधिकारी छान्न समस्या भएको एक नेताले बताए । 

मंसिर २५ र २६ गते मोरङको विराटचोकमा सम्पन्न माओवादी केन्द्र प्रदेश १ को अधिवेशनबाट नेतृत्व छान्न नसकेपनि माओवादीले २७१ जनाको प्रदेश समिति भने चयन गरेको छ ।

११ सयभन्दा बढी प्रतिनिधिबाट २७१ छानेर केन्द्रका नेताहरूले आफ्ना मान्छे राख्न पदाधिकारी खाली राखेको एक नेताले आरोप लगाए ।

यस्ता गतिविधिले पार्टीलाई थप कमजोर बनाउने उनको चिन्ता छ ।