प्रचण्डको प्रतिवेदनमा छलफल सकियो, बन्दसत्रमा निष्कर्ष प्रस्तुत हुँदै

नेकपा माओवादी केन्द्रको आठौं महाधिवेशनको बन्दसत्रमा अध्यक्ष पुष्पकमल दाहाल प्रचण्डले प्रस्तुत गरेको ‘एक्काइसौँ शताब्दीमा समाजवादको नेपाली बाटो’ शीर्षकको राजनीतिक प्रतिवेदनमाथि छलफलको समय सकिएको छ ।

समूहगत छलफल सकिएपछि नेपाल प्रज्ञा प्रतिष्ठानमा माओवादी केन्द्रको बन्दसत्रमा समूह नेताले प्रतिवेदनमाथि सुझाव र निष्कर्ष प्रस्तुत गर्न थालेका छन् । 

शुरूमा मंगलवार मात्रै छलफलको समय दिइएको भए पनि पछि समूहमा छलफलको लागि समय लाग्ने भएपछि बुधवार दिउँसो १२ बजेसम्मको लागि समय थप गरिएको थियो । 

प्रचण्डको प्रतिवेदनमाथि छलफलको लागि करीब १७०० प्रतिनिधिलाई २५ समूहमा विभाजन गरिएको थियो ।

हरेक समूहका नेतालाई सुझाव र निष्कर्ष प्रस्तुत गर्नको लागि १५ मिनेटको समय दिइएको छ ।

समूहबाट आएको सुझावलाई समेटेर प्रचण्डले प्रतिवेदनलाई पूर्णता दिनेछन् । 

नेकपा माओवादी केन्द्रको आठौं महाधिवेशनले विचार र पार्टीलाई क्रान्तिकारी धारको बनाउने दाबी माओवादी नेताहरूले गरेका छन् ।