माओवादी महाधिवेशनको पाँचौ दिन, बाँकी १४ समूहको निष्कर्ष प्रस्तुति शुरू

नेकपा माओवादी केन्द्रको आठौं महाधिवेशनको पाँचौं दिन बिहीवार पनि समूहगत छलफलको निष्कर्ष प्रस्तुत गर्न शुरू भएको छ ।

महाधिवेशनमा अध्यक्ष पुष्पकमल दाहाल ‘प्रचण्ड’ले प्रस्तुत गरेको ‘एक्काइसौं शताब्दीमा समाजवादको नेपाली बाटो’ शीर्षकको प्रतिवेदनमा २५ समूह बनाएर छलफल भएको थियो । 

बुधवारबाट समूहको निष्कर्ष प्रस्तुत गर्न थालिएको थियो । बुधवार जम्मा ११ वटा समूहले मात्रै निष्कर्ष सुनाउन भ्याएका थिए । बिहीवार बाँकी १४ वटा समूहको निष्कर्ष प्रस्तुत हुँदैछ ।

बुधवार समूहका निष्कर्ष प्रस्तुत गर्नेहरूले प्रचण्ड र प्रतिवेदनको प्रशंसा गरेका थिए । धेरैजसोले संविधान जारी गर्दा माओवादीले थाती राखेर मुद्दा ब्यूँताएर अघि बढ्नुपर्ने सुझाव दिएका थिए ।

माओवादीले त्यसबेला प्रत्यक्ष निर्वाचित कार्यकारी राष्ट्रपतिको एजेण्डा उठाउने गरेको थियो । संविधान जारी गर्ने बेलामा माओवादीले ‘नोट अफ डिसेन्ट’ लेखेर संसदबाट निर्वाचित राष्ट्रपति स्वीकार गरेको थियो । 

बन्दसत्रमा पूर्ण समानुपातिक निर्वाचन प्रणालीमा जानुपर्ने सुझाव पनि आएका छन् । निर्वाचन प्रणाली सुधार गर्नुपर्ने र निर्वाचित सांसदलाई मन्त्री बनाउन नहुने लगाएका सुझाव पनि आएका छन् । 

सबै समूहले सुझाव प्रस्तुत गरेपछि अध्यक्ष प्रचण्डले जवाफ दिने र सुझावलाई समेटेर प्रतिवेदनलाई पनि परिमार्जन हुने माओवादी केन्द्रका नेताहरूले बताएका छन् ।