लोकान्तर समाचार प्रभाव : पूर्व मुख्यमन्त्री राईले फिर्ता गरे सरकारी गाडी

१ नम्बर प्रदेश सरकारका पूर्व मुख्यमन्त्री शेरधन राईले प्रयोग गर्दै आएको सरकारी गाडी फिर्ता गरेका छन् ।

मुख्यमन्त्रीबाट राजीनामा दिइसकेको ४ महिनासम्म पनि राईले गाडी फिर्ता नगरेको विषयमा लोकान्तरमा पुस १२ गते ‘पूर्व मुख्यमन्त्री शेरधन राईले फिर्ता गरेनन् सरकारी गाडी, ४ महिनादेखि कब्जामा’ शीर्षकको समाचार प्रकाशित भएको थियो ।

समाचार प्रकाशितपछि राईको चर्काे आलोचना भएपछि उनले गाडी फिर्ता गरेका छन् । काठमाडौंमा नै पूर्व मुख्यमन्त्री राईले गाडी जिम्मा लगाएका १ नम्बर प्रदेशको आर्थिक मामिला तथा योजना मन्त्रालयका सचिव सुमन दाहालले पुष्टि गरे ।

काठमाडौंमा गाडी कसले बुझ्यो भन्नेबारे उनले खुलाउन चाहेनन् । ‘गाडी लिन आउनुहोस् भनेर माननीयज्यूले फोन गर्नुभएको थियो,’ सचिव दाहालले भने, ‘मन्त्रालयबाट ड्राइभर पठाएर अब गाडी ल्याउने तयारी भइरहेको छ ।’ 

देशमा धेरै नेताहरूले गाडीको दुरुपयोग गरेको भन्दै उनले प्रदेशका संस्थापक मुख्यमन्त्रीको विषयमा मिडियाले धेरै लेख्नु नहुने सुझाव दिए । 

पूर्व मुख्यमन्त्रीको सेवासुविधाका विषयमा प्रदेश सरकारले हालसम्म कुनै कानून बनाएको छैन । कानून नै नभएको गाडी सुविधा राईले ४ महिना प्रयोग गरेका छन् । राईले गत भदौमा मुख्यमन्त्री पदबाट राजीनामा दिएका थिए ।

आर्थिक मामिला तथा योजना मन्त्रालयको कार्यभार आफैंले सम्हालेका बेला राईले कागजात विनै मन्त्रालयको गाडी लिएका थिए । उनले को१झ ५६५ नम्बरको गाडी प्रयोग गर्ने गरेका थिए ।

पूर्व मुख्यमन्त्री शेरधन राईले फिर्ता गरेनन् सरकारी गाडी, ४ महिनादेखि कब्जामा