प्रधानमन्त्री शेरबहादुर देउवाले शुक्रवार राष्ट्रका नाममा सम्बोधन गर्ने भएका छन् । 

दिउँसो ३ बजे राष्ट्रका नाममा सम्बोधनको तयारी भएको प्रधानमन्त्रीको सचिवालयले जानकारी दिएको छ ।

सरकार गठन भएको ६ महिनापछि देउवाले पहिलो पटक राष्ट्रका नाममा सम्बोधन गर्न लागेका हुन् । सरकारले ६ महिनामा गरेका उपलब्धि, कोरोना महामारी नियन्त्रणमा सरकारले गरेका कामलगायत विषय सम्बोधनमा समेटिन लागेको प्रधानमन्त्रीको सचिवालयले जनाएको छ । 

प्रधानमन्त्रीको सम्बोधन लगत्तै बालुवाटारमा सरकार सञ्चालनमा सहजीकरण गर्न गठित उच्चस्तरीय राजनीतिक संयन्त्रको बैठक बस्दैछ । ४ बजेका लागि बैठक तय भएको सञ्चारमन्त्री ज्ञानेन्द्रबहादुर कार्कीले जानकारी गराएका छन् । स्थानीय तहको चुनावको मितिबारे बैठकमा छलफल हुँदैछ । 

सत्तारुढ दल माओवादी केन्द्रका अध्यक्ष पुष्पकमल दाहाल प्रचण्डले वैशाखमा प्रतिनिधि सभाको चुनाव गर्न गठबन्धनमा राखेको प्रस्तावलाई लिएर कांग्रेसभित्र असन्तुष्टि बढेको छ । संयन्त्रको बैठकअघि बिहीवार प्रधानमन्त्री एवं कांग्रेस सभापति देउवा, माओवादी अध्यक्ष प्रचण्ड र नेकपा (एस)का अध्यक्ष माधव नेपालबीच छलफल भएको थियो । 

निर्वाचन आयोगले वैशाखमा स्थानीय तहको चुनाव गर्न माघ पहिलो साताभित्र मिति घोषणा गर्न सरकारसँग आग्रह गरेको थियो ।