भारतको विपक्षी दल कांग्रेसका वरिष्ठ नेता राहुल गान्धीले भारतमा अभिव्यक्ति स्वतन्त्रता दबाउन ट्विटर नजानिँदो तवरले मतियार बनेको बताएका छन् । 

बिहीवार ट्विटरलाई पत्र पठाएर गान्धीले आफ्नो फलोअर संख्या प्रधानमन्त्री नरेन्द्र मोदी, गृहमन्त्री अमित शाह र कांग्रेस नेता शशी थरूरसँग तुलना गरे । 

सन् २०२१ को पहिलो सात महिनामा आफूले चार लाख नयाँ फलोअर पाएको तर अगस्ट महिनामा अकाउन्ट आठ दिनका लागि सस्पेन्ड भएपछि फलोअर संख्या घट्न थालेको गान्धीले बताए । 

उनले लेखे, ‘मलाई ट्विटर इन्डियाका मानिसले सुटुक्क के भनेका छन् भने सरकारले मेरो आवाज दबाउनका लागि उनीहरूलाई चरम दबाब दिइरहेको छ । मेरो अकाउन्ट केही दिनका लागि विना वाजिब कारण ब्लक गरियो । अरूले पनि मैले जस्तै तस्वीर राखेको भए पनि उनीहरूको अकाउन्ट ब्लक गरिएन । म एक्लैलाई तारो बनाइयो ।’

तर ट्विटरले फलोअर संख्या बढाउने घटाउने विषयमा एकरत्ति पनि चलखेलको गुञ्जायस नभएको बताएको छ । फलोअर संख्या तलमाथि हुन सक्ने सम्भावना रहन्छ तर ट्विटर आफैंले घटाउने बढाउने काम गर्दैन, ट्विटर प्रवक्ताले बताए ।