विश्वविद्यालय अनुदान आयोगले नै संस्कृत विश्वविद्यालयमा पढ्ने विद्यार्थीहरूलाई विभेद गरेको भन्दै त्यसलाई तत्काल नसच्चाइए आन्दोलन गर्ने घोषणा विद्याथीहरूले गरेका छन् ।

नेपाल संस्कृत विश्वविद्यालयमा विद्यावारिधि अध्ययरत विद्यार्थीहरूले विश्वविद्यालय अनुदान आयोगले गरेको विभेद सच्च्याउनुपर्ने माग गरेका हुन् ।

आयोगले नै आव्हान गरेको छात्रवृत्ति तथा अनुदानको लागि प्रस्ताव लिएर गएका विद्यार्थीहरूलाई आयोगका कर्मचारीले नेपाल संस्कृत विश्वविद्यालयबाट आधुनिक विषय (स्नातकोत्तर तहमा ५ वर्ष अध्ययन नभएका)लाई आयोगले दिने विद्वतवृत्ति दिन नसक्ने र विद्यावारिधि पनि मान्य नहुने अभिव्यक्ति दिएको नेपाल संस्कृत विश्वविद्यालयका विद्यार्थीको आरोप छ । 

विद्यावारिधि अध्ययनरत विद्यार्थीहरूले शिक्षामन्त्री, कुलसचिव, नेपाल संस्कृत विश्वविद्यालयका शिक्षाध्यक्ष, अनुसन्धान केन्द्र निर्देशक र विश्वविद्यालय अनुदान आयोगका अध्यक्षलाई ध्यानाकर्षण पत्र बुझाउँदै यसको वास्तविकता विद्यार्थीलाई जानकारी दिन माग गरेका छन् ।

विश्वविद्यालय अनुदान आयोगमा विद्वत वृत्तिका लागि आवेदन दिने व्यवस्था मिलाउन, विद्वतवृत्ति तथा अन्य छात्रबृत्तिहरूमा विभेदपूर्ण व्यवहार नगर्न पनि माग गरिएको नेपाल संस्कृति विश्वविद्यालयका विद्यार्थी शंकर भण्डारीले बताए । 

संस्कृति विश्वविद्यालय र अन्य विश्वविद्यालयबाट प्रदान गरिने विद्यावारिधिको समान मान्यता हुनुपर्ने उनीहरूको माग छ ।

संस्कृति विश्वविद्यालयका विद्यार्थीहले पाँच दिनभित्र माग पूरा नभए आन्दोलन गर्ने चेतावनी दिएका छन् ।