कोभिड–१९ संकट व्यवस्थापन केन्द्र (सीसीएमसी) ले सार्वजनिक यातायातमा जोरबिजोर प्रणाली लागू नगर्न सरकारलाई सिफारिस गरेको छ ।

शुक्रवार बसेको सीसीएमसीको बैठकले सार्वजनिक यातायातमा जोरबिजोर नगर्न सिफारिस गरेको सीसीएमसीकी प्रवक्ता सुनिता नेपालले जानकारी दिइन् ।

जोरबिजोरले सडकमा सार्वजनिक यातायातको संख्या घट्दा यात्रुको चाप बढेको र कोरोनाको जोखिम झन् बढेको भन्दै सरकारको आलोचना भएको थियो ।

सीसीएमसीको बैठकले माघ मसान्तसम्मै विद्यालयमा भौतिक रूपमा पठनपाठन नगर्न समेत सिफारिस गरेको छ । यसअघि सरकारले माघ १५ गतेसम्म भौतिक रूपमा पठनपाठन नगर्ने निर्णय गरेको थियो ।

बैठकले सिनेमा हल माघ मसान्तसम्म नखोल्न सिफारिस गर्ने निर्णय समेत गरेको छ । सीसीएमसीको निर्णय मन्त्रिपरिषद् बैठकबाट पारित भएपछि कार्यान्वयनमा जानेछ ।