अमेरिकी सहयोग परियोजना 'एमसीसी'लाई लेखेको र एमसीसीले आफूहरूलाई पठाएको पत्र सार्वजनिक भएपछि नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले प्रधानमन्त्री शेरबहादुर देउवालाई फोन गरेर आपत्ति जनाएका छन् ।

पत्र सार्वजनिक भएलगत्तै देउवासँग फोन संवाद गरेका प्रचण्डले अहिले आएर पत्र सार्वजनिक गर्नुको कारण के हो ? भनेर समेत प्रश्न गरेको प्रचण्डनिकट स्रोतले लोकान्तरलाई जानकारी दियो ।

'तपाईं र मबीच तत्काल एमसीसी पारित नगर्ने सहमति भएको थियो, तर अहिले आएर यो पत्र सार्वजनिक गर्नुको कारण के हो ?' प्रचण्डले देउवालाई गरेको प्रश्न उद्धृत गर्दै स्रोतले भन्यो ।

जवाफमा देउवाले भने आफूले पत्र सार्वजनिक नगरेको बताएका थिए । पत्र कसरी सार्वजनिक भयो भन्ने विषयमा आफू अनभिज्ञ रहेको देउवाको जवाफ थियो ।  

एमसीसी सम्झौता संसदबाट अनुमोदनका लागि फेब्रुअरी २८ (फागुन १६)सम्मको समय माग्दै देउवा र प्रचण्डले लेखेको पत्र आइतवार सार्वजनिक भएको छ ।

एमसीसीले उक्त प्रतिबद्धता स्मरण गराउँदै देउवा र प्रचण्डलाई लेखेको पत्र पनि सार्वजनिक भइसकेको छ ।