केही वर्षयता निकै नाम चलेका एवं चल्तीका एक ‘हिरो’ (नायक/मोडल)लाई फेसबूकमा एउटा ‘फ्रेन्ड रिक्वेस्ट’ आयो । 

कलाकार भएपछि रिक्वेस्ट त आउने नै भयो, फेसबूकमा अझै पनि सयौं समर्थक उनीसँग साथी बन्नका लागि ‘क्यु’मा छन् ।

आएका रिक्वेस्टमध्ये छानेर केही–केहीलाई मात्र साथी बनाउँछन् ।

उनले प्रोफाइल नियाले । चिनजानका आफन्त र कलाकारहरू पनि ‘म्युचुअल फ्रेन्ड’ थिए । प्रोफाइलमा आकर्षक फोटो थियो ।

ब्रान्डेड कपडा, ब्रन्डेड जुत्ता... हेर्दा हुने खानेकै छोरीजस्तो देखियो ।

सबै कुरा नियालेपछि उनले साथी बन्न उचित ठाने, अनि ‘रिक्वेस्ट’ स्वीकारे ।

साथी बनेको ३/४ दिनपछि म्यासेज आयो– हाइ !

उनले छोटै जवाफ फर्काए– हेलो ।

विस्तारै कुराकानी हुन थाल्यो । युवतीले आफू ठूलै फ्यान भएको बताइन् ।

केही दिनको कुराकानीपछि भेट्ने निधो भयो ।

त्यसपछि उनीहरू उपत्यकाका क्याफेहरूमा नियमित जसो भेट्न थाले ।

कहिले बानेश्वर, कहिले अनामनगर, त कहिले बिजुली बजारको क्याफेमा बसेर उनीहरू गफिन्थे ।

हरेक भेटमा युवतीले नै कफी खुवाउँथिन् । बिल तिर्न उनी नै अगाडि बढ्थिन् ।

उनीहरूबीचको कुराकानी अब फेसबूक म्यासेन्जरमा मात्र सीमित थिएन, फोनमार्फत पनि गफिन थालिसकेका थिए ।

यसबीचमा एकदिन उनीहरू टोखा पुगे । त्यहीँको एक होटलमा रूम बूक गरेर दिनभरी बसे । सहमतिमै उनीहरूबीच शारीरिक सम्बन्ध भयो ।

साँझ दुवै आ–आफ्नो घर गए ।

त्यसपछि कामको व्यस्तताका कारण २/३ दिन युवतीसँग कुरा गर्न भ्याएनन् । 

अलि फुर्सद मिलेपछि फोन गरे । युवतीले राम्रो रोस्पोन्स गरिनन् ।

भेट्ने कुरा गर्दा बहाना बनाइन् ।

के भएछ भनेर सोच्न नपाउँदै ती कलाकार छाँगाबाट खसेजस्तै भए– युवतीले आफूसँगको सम्बन्धलाई देखाउँदै बार्गेनिङ पो गर्न थालिन् ।

१० लाख नदिए सम्बन्ध बाहिर ल्याइदिने धम्की उनले दिइन् ।

बदनामीको डरले उनी पैसा दिन राजी भए ।

एकैपटक नभएर किस्ता–किस्तामा पैसा दिने सहमति बन्यो ।

उनले विभिन्न किस्ता गरी ८ लाख रुपैयाँ बुझाए ।

अन्तिम किस्ताबापत २ लाख बुझाउन बाँकी छँदा भने उनलाई ती युवतीको नियतमाथि थप शंका लाग्यो ।

आफूलाई युवतीको दाइ बताउने एक युवकले भिडियो सार्वजनिक गरिदिने धम्की समेत दिन थालेका थिए ।

१० लाख नै दिए पनि ‘ब्ल्याकमेल’ गर्न नछाड्ने निश्चय गरेर उनी उजुरी दिन महानगरीय प्रहरी अपराध महाशाखामा पुगे ।

‘८ लाख रुपैयाँ दिइसकेपछि उहाँ यहाँ आउनुभएको थियो, तर पैसा दिएको प्रमाण नभएकाले कारवाही गर्न अप्ठ्यारो परेको छ,’ महाशाखाका एक अनुसन्धान अधिकृतले भने, ‘उहाँले नगदमै पैसा दिएकाले समस्या भयो ।’

अनुसन्धानका क्रममा प्रहरीले ती युवतीलाई बोलाएर सोधपुछ गरेको थियो ।

ती अधिकृतका अनुसार युवतीले आफूले पैसा नलिएको जिकिर गरिन् ।

नाम चलेकै कलाकार भए पनि कानूनी कुरा र सामाजिक सञ्जालबाट हुने अपराधका बारेमा सामान्य जानकारी समेत नपाउँदा प्रहरी चकित बन्यो ।

‘उहाँमा कानून र सामाजिक सञ्जालबाट हुने अपराधको सामान्य ज्ञान पनि पाइएन । नाम चलेका ठूला कलाकारले त कम्तिमा यस्ता विषयमा ज्ञान राख्नुपर्छ,’ लोकान्तरसँगको कुराकानीमा ती प्रहरी अधिकृतले भने ।

(अनुसन्धानमा रहेको विषय भएकाले प्रहरीकै अनुरोधमा पहिचान खुलाइएको छैन ।)