रुसले जापान नजिक अन्तर्राष्ट्रिय जलक्षेत्रमा आफ्ना २४ वटा जंगी जहाजहरू तैनाथ गरेको छ । 

युक्रेन तनाव चलिरहेको बेलामा रुसले यसरी जापान नजिक जंगी जहाजहरू तैनाथ गर्नुलाई अर्थपूर्ण मानिएको छ । 

जापानका रक्षामन्त्री नोबुओ किशीका अनुसार, ती युद्धपोतहरू फेब्रुअरी १ मा जापान सागर तथा ओखोत्स्क सागरमा देखिएका हुन् । रुसको सम्पूर्ण जलसेनाले अभ्यास गर्न लागेको बुझिएको छ । 

‘रुसी सेनाले पूर्व र पश्चिम दुवैतर्फ आफ्ना गतिविधिहरू बढाइरहेको छ । युक्रेनमा चलिरहेको तनावमा आफ्नो शक्तिप्रदर्शन गर्नका लागि रुसले यो गरेको हुनुपर्छ । रुसको सम्पूर्ण जलसेनाले यस बेलामा विशाल स्तरको सैन्य अभ्यास गर्नु अत्यन्तै असाधारण घटना हो,’ किशीले बताए । 

रुसको यो गतिविधिलाई जापानको मेरिटाइम डिफेन्स फोर्सका डिस्ट्रोयर र पी–३सी एन्टी सबमरिन र मेरिटाइम सभेैलान्सले पत्ता लगाएका हुन् । 

रुसले डिस्ट्रोयर, फ्रिगेट र पनडुब्बीहरू पनि तैनाथ गरेको छ । 

रुसले जापानको पीडाका रूपमा रहेको कुरिल टापुसमूहमा शक्तिप्रदर्शन गरेर कडा सन्देश दिन खोजेको विश्लेषकहरू बताउँछन् ।