एमसीसीबारे माधव नेपालको पार्टीमा दुई लाइन !

माधव कुमार नेपाल नेतृत्वका नेकपा एकीकृत समाजवादी पार्टीमा एमसीसीको विषयलाई लिएर मतभेद देखिएको छ । शनिबार बसेको सो पार्टीको स्थायी समिति बैठकपछि प्रचार विभाग प्रमुख जगन्नाथ खतिवडाले जारी गरेको विज्ञप्तिमा संशोधन नभएको एमसीसी कम्प्याक्ट टेबल हुने कुरा औचित्यपूर्ण नहुने र पार्टी जर्बजस्ती गरेर टेबल गर्ने कुराको पक्षमा नरहेको स्पष्ट गरिएको छ । 

तर, महासचिव बेदुराम भुसालले जारी गरेको अर्को विज्ञप्तिमा चाहिँ एमसीसी टेबुल गर्न दिने उल्लेख छ । एकीकृत समाजवादीको बैठकपछि भएको छलफलको विषयलाई विज्ञप्तिमार्फत जिम्मेवार नेताहरुले नै फरक फरक धारणा ल्याएका हुन् । पार्टीमा नेता झलनाथ खनाललगायत एमसीसी कुनै पनि हालतमा पारित हुन नसक्ने पक्षमा छन् भने माधव नेपाललगायत यो विषय केही लचक रहेको बताइन्छ । एमसीसीकै विषयमा माओवादी भने पारित हुन नहुने पक्षमा छ । सत्ता गठबन्धनमा एमसीसीबारे एकमत नहुँदा प्रधानमन्त्री शेरबहादुर देउवाले प्रस्ताव टेबल गर्न सकेका छैनन् । आइतबारको संसद बैठकको सम्भावित कार्यसूचीमा पनि एमसीसी राखिएको छैन । संसद बैठक दिउँसो १ बजे बस्नेछ ।