नेपाल राष्ट्र बैंकले घरजग्गा, गाडी र शेयर कर्जामा १५० प्रतिशतसम्मको जोखिम भार तोकेर एकीकृत निर्देशन जारी गरेको छ । 

राष्ट्र बैंकले उक्त क्षेत्रलाई अनुत्पादक मानेर बैंक तथा वित्तीय संस्थाबाट प्रवाह हुने रियलस्टेट, हायर पर्चेज, पर्सनल ओभरड्राफ्ट र मार्जिन प्रकृतिको ऋणमा प्रवाह हुने कर्जामा थप कडाइ गर्ने गरी जोखिम भार बढाएको हो । 

यो व्यवस्था आगामी असारबाट लागू हुने राष्ट्र बैंकले बताएको छ । 

राष्ट्र बैंकले ५ फागुनमा जारी गरेको चालू आबको मौद्रिक नीतिको अर्धवार्षिक समीक्षाले गरेको व्यवस्थालाई कार्यान्वयन गर्न बुधबार वाणिज्य बैंक, विकास बैंक र फाइनान्स कम्पनीहरूबाट उक्त व्यवस्था कार्यान्वयन गर्न एकीकृत निर्देशन जारी गरेको हो । 

राष्ट्र बैंकको निर्देशनअनुसार हाल १०० प्रतिशतसम्म मात्रै जोखिम भार कायम गर्नुपर्ने पर्सनल ओभरड्राफ्ट, व्यक्तिगत सवारी कर्जा तथा अटो लोन, घरजग्गा र शेयर कर्जामा १५० प्रतिशतसम्मको जोखिम भार कायम गर्नुपर्ने व्यवस्था भएको छ ।

राष्ट्र बैंकले आयात कर्जाको लागिसमेत १२० प्रतिशतको जोखिम भार कायम गर्न ‘क’देखि ‘ग’ बर्र्गसम्मका बैैंक तथा वित्तीय संस्थालाई निर्देशन जारी गरेको छ । आयात कर्जामा भने यस अघि १०० प्रतिशतको जोखिम भार कायम गर्नुपर्ने व्यवस्था गरेको थियो ।

राष्ट्र बैंकले गरेको व्यवस्थाले १०० प्रतिशत जोखिम भार भएको शेयर धितोमा अब १५० प्रतिशत बनाइएको छ । शेयर धितो कर्जामा यस अघि पनि १५० प्रतिशत नै हुनुपर्ने जोखिम भारलाई पनि राष्ट्र बैैंकले पछिल्लो समय घटाएर १०० प्रतिशत बनाइएको थियो । अब फेरि बढेको छ ।

राष्ट्र बैंकले गरेको व्यवस्था अनुसार १०० प्रतिशत जोखिम भार हुँदा कसैले १ करोड रुपैयाँको कर्जा लियो भने त्यसको जोखिम भार १ करोड रुपैयाँ नै हुन्छ । 

यो व्यवस्थाले यस अघि १० प्रतिशतको मात्रै पुँजी पर्याप्तता कायम गर्नुपर्दा १० लाख रुपैयाँ मात्रै बैंकको पुँजी भए पुग्ने थियो । अब १२ प्रतिशतले पुँजी पर्याप्तता कायम गर्नुपर्ने भयो भने साढे १२ लाख रुपैयाँ नै पुँजी चाहिन्छ ।

राष्ट्र बैंकले १५० प्रतिशत जोखिम भार कायम गर्नु भनेको १ करोड रुपैयाँ कर्जा लिदा यसको जोखिम भार क्षमता १ करोड ५० लाख रुपैयाँ हुनु हो ।

यसो हुँदा यस अघि १२ लाख मात्रै पुँजी भए पुग्नेमा अब साढे १८ लाख रुपैयाँ बढी पुँजी चाहिने हुन्छ । यो व्यवस्था पछि बैंकहरूलाई पुँजी पर्याप्तता दबाब पर्ने हुँदा बैैंकहरूले कर्जा नै नदिने र दिए पनि ब्याजदर महंगो पर्छ ।