नेपाली सेनाले ४ वटा हिमाल भएका ३५ टन फोहोर संकलन गर्ने भएको छ ।

सेनाले सगरमाथा, कञ्चनजंघा, ल्होत्से र मनास्लुमा रहेको फोहोर संकलन गरेर रिसाइकलिङ गर्न लागेको सेनाले जनाएको छ । 

सगरमाथाबाट बेस क्याम्पभन्दा माथि रहेका ६ टन र बेस क्याम्प वरपरका ८ टन गरी १४ टन फोहोर संकलन गरिने सेनाले जनाएको छ । 

कञ्चनजंघाको बेस क्याम्प वरपरको ७ र बेस क्याम्पभन्दा माथि ३ टन गरी १०, ल्होत्सेको बेस क्याम्प वरपर ४ र बेस क्याम्पभन्दा माथि २ गरी ६ टन र मनास्लुको बेस क्याम्पमा ३ र बेस क्याम्पभन्दा माथि २ गरी ५ टन समेत जम्मा ३५ टन फोहोर संकलन गर्न लागेको नेपाली सेनाका सहयाक रथि हिमान्सु खड्काले केही दिनअगाडि जङ्गी अड्डामा भएको पत्रकार सम्मेलनमा जानकारी दिएका थिए । 

सेनाले आफ्नो नेतृत्वमा विभिन्न निकायहरूसँगको समन्वयमा ३ चरणको कार्याक्रम बनाएर हिमाल सफा गर्न लागेको छ । 

यस क्रममा पर्यटन विभाग, वातावरण विभाग, हिमालयन एसोसिएसन, पर्यटन बोर्ड लगायतका सरकारी र गैरसरकारी निकायसँग समन्वय गरिने सेनाले जनाएको छ । 

पहिलो चरणमा कात्तिक २० गतेदेखि फागुन १५ गतेसम्म पूर्व तयारीको काम सकिएको छ । दोस्रो चरणमा फागुन १५ गतेदेखि चैत १५ गतेसम्म तालिम सञ्चालन गरिएको छ भने फागुन २२ गतेदेखि ४ वटा हिमालहरूको सफाइ शुरू गर्न लागेको सेनाले जनाएको छ । 

अघिल्लो वर्ष सेनाले धवलागिरि, मकालु र सगरमाथा ३ वटा हिमालबाट २७.६ टन फोहोर संकलन गरेर १० टन रिसाइकल गरेको थियो । सफाइका क्रममा सेनाले ४ वटा मृत शरीरहरू पनि फेला पारेको थियो । ४ वटा हिमालमा ३ सय मृत शरीर भएको अनुमान गरिएको सेनाले जनाएको छ ।

हिमालयमा हिउँ पग्लिने क्रम देखा परेको र जलवायु परिर्वतनका असरहरू वृद्धि भएको भन्दै त्यसलाई नियन्त्रण गर्ने अपेक्षासहित नेपाल सरकारको सहयोगमा सेनाले हिमाल सफाइ अभियान शुरू गरेको हो ।

कति लाग्छ जनशक्ति ?

हिमाल सफाइ अभियानमा ९१ जना जनशक्ति लाग्ने नेपाली सेनाले जनाएको छ । सगरमाथा, ल्होत्से, कञ्चनजंघा र मनास्लुमा १/१ जना अभियान लिडर र २/२ जना डाक्टर अधिकृत तथा बेस क्याम्प म्यानेजर खटिने छन् ।

सगरमाथामा र ल्होत्सेमा ८/८ जना र कञ्चनजंघा र मनास्लुमा ६/६ जनाको भेरिफिकेसन मोनिटरिङ टीम, फोहोर संकलन र लोड गर्ने कुल ४८ जना र रियर अप्स तथा समन्वयका लागि १४ जना लाग्ने नेपाली सेनाले जनाएको छ । सेनाले लोड फेरीका लागि आवश्यक परेका शेर्पा सपोर्टरहरूको संख्या थप गर्न सकिने बताएको छ ।

साढे ४ करोड रकम अपुग

सेनाले लक्षित फोहोर संकलन गर्नका लागि सरकारले छुट्टयाएको रकममा ४ करोड ६६ लाख ७० हजार ३७२ रुपैयाँ अपुग हुने बताएको छ । 

सेनाका अनुसार १२ करोड २९ लाख ६७ हजार ३७२ रुपैयाँ खर्च लाग्छ । तर सरकारले ८ करोड ३० लाख रुपैयाँ मात्र खर्च छुट्टयाएको छ ।  

पर्सनल क्लोदिङ तथा इक्युपमेन्ट खरिदमा ९६ लाख, ह्यान्डलिङ एजेन्सीको खरिदमा ६ करोड १९ लाख ५० हजार, भत्तामा ६९ लाख ४२ हजार र विविध खर्चमा ४ करोड ४५ लाख रुपैयाँ लाग्ने सेनाले जनाएको छ ।

अघिल्लो वर्ष सरकारले १० करोड रुपैयाँ रकम विनियोजन गरेको थियो । सेनाले आफ्नो तर्फबाट हवाइ इन्धन, मेडिकल खर्च र सञ्चारमा मात्रै १ करोड ३० लाख रुपैयाँ खर्च हुने बताएको छ ।

तस्वीरहरू : हिमाल सफाइ अभियान