निर्वाचन आयोगले निर्वाचनका लागि आवश्यक कर्मचारीको व्यवस्थापन र सरुवा बढुवाको काम  चैत १५ गतेभित्र गरिसक्न सरकारलाई निर्देशन दिएको छ ।

आयोगले निर्वाचनका लागि आवश्यक पर्ने कर्मचारीदेखि अन्य कतै सरुवा गर्नुपर्ने, खटाउनु पर्ने भए सबै काम चैत १५ गते सम्ममा सम्पन्न गरिसक्न निर्देशन दिएको हो ।

आयोगका प्रवक्ता शालिग्राम शर्मा पौडेलका अनुसार आयोगको आज बसेको बैठकबाट नेपाल सरकार (मन्त्रिपरिषद)लाई २४ बुँदे निर्देशन दिएको छ ।

आयोगले निर्वाचनका लागि अन्य तयारीका कामहरू पनि अगाडि बढिरहेको  जनाएको छ ।

पौडेलका अनुसार स्थानीय निर्वाचनका लागि सोमवारसम्ममा कूल ८० राजनीतिक दलले आयोगमा दल दर्ता गरिसकेका छन् ।

सरकारले आगामी वैशाख ३० गते स्थानीय तहको निर्वाचन गर्ने गरी मिति घोषणा गरेको छ । स्थानीय निर्वाचन आउन अब जम्मा ७३ दिन बाँकी छ ।