सरकारले अमेरिकी आर्थिक सहयोग कार्यक्रम मिलेनियम च्यालेन्ज कर्पोरेसन (एमसीसी)सँगको सम्झौता अनुमोदन गर्ने प्रक्रियामा सघाएको भन्दै प्रमुख प्रतिपक्षी दल नेकपा एमालेलाई धन्यवाद दिएको छ ।

एमसीसी अनुमोदन भएको भोलिपल्ट फागुन १६ गते बसेको मन्त्रिपरिषद् बैठकले अनुमोदन सहज गराउन भूमिका खेलेको भन्दै गठबन्धनका दलहरूलाई समेत धन्यवाद ज्ञापन गरेको छ । 

फागुन १५ गते प्रतिनिधि सभाबाट एमसीसी पारित गर्दा एमालेले नाराबाजी गरिरहेको थियो । 

सरकारका प्रवक्ता सञ्चारमन्त्री ज्ञानेन्द्रबहादुर कार्कीले बुधवार मन्त्रालयमा पत्रकार सम्मेलनको आयोजना गरी एमसीसी अनुमोदन गराउन सहज वातावरण बनाउन सहयोग गर्ने गठबन्धनका दल, प्रमुख प्रतिपक्षी दल, सभामुख र सदस्यहरूप्रति धन्यवाद ज्ञापन गर्ने प्रस्ताव पारित भएको जानकारी गराएका हुन् । 

सरकारले छिमेकीलगायत कुनैपनि मित्रराष्ट्रविरुद्ध नेपाली भूमि प्रयोग हुन नदिने प्रतिबद्धता दोहोर्‍याएको छ । 

‘सबै मुलुकसँग मैत्रीपूर्ण सम्बन्ध कायम गर्ने नेपालको परराष्ट्र नीतिको मर्म अनुरूप छिमेकी मित्रराष्टहरू भारत एवं चीन कुनैपनि मित्रराष्ट्रका विरुद्ध नेपालको कुनै भूमि प्रयोग हुन नदिन प्रतिबद्धता व्यक्त गर्ने निर्णय भएको छ,’ मन्त्री कार्कीले भने । 

एमसीसी पारित गर्ने क्रममा चीनले चासो व्यक्त गरेको थियो । सरकारले नेपालको आर्थिक विकासमा सहयोग पुर्‍याउने संघ सस्थालाई पनि धन्यवाद ज्ञापन गरेको छ ।