आईसीसी क्रिकेट विश्वकप लीग टू अन्तर्गत बुधवार भएको १ दिवसीय सिरिजमा नेपालले पपुवा न्यूगीनी (पीएनजी) विरुद्ध २ विकेटको जीत निकालेको छ ।

शुरूमा ब्याटिङ गरेको पीएनजीले नेपाललाई जीतका लागि २०५ रनको लक्ष्य दिएको थियो । नेपालले खेलमा ४ बल बाँकी छँदै ४९.२ ओभरमा ८ विकेट गुमाउँदै २१० रन जोडेर जितेको छ ।

यूएईको सारजाह मैदानमा भएको खेलमा पीएनजीले टस जितेर ब्याटिङ रोजेको थियो । पीएनजीले ५० ओभर खेल्दा ८ विकेट गुमाउँदै २०४ रन मात्रै जोडेको थियो ।

नेपालको जीतका लागि रोहित पौडेल र आरिफ शेखले शतकीय साझेदारी इनिङ खेलेका छन् । रोहितले ५८ रन जोड्दा आरिफले ५३ रन बनाएका छन् ।

नेपालले दोस्रो खेलमा शुक्रवार यूएईसँग खेल्दैछ । नेपालले तेस्रो खेल यूएईविरुद्ध नै २१ मार्चमा खेल्ने तय छ ।