नेपाली कांग्रेसका महामन्त्री गगन थापाले त्रिभुवन विश्व विद्यालयको रङ उडेको, नूर गिरेको र मान प्रतिष्ठा गुमाएको जस्तो अनुभव भएको बताएका छन् । 

त्रिवि कर्मचारी संगठनको कार्यक्रमलाई बुधवार कीर्तिपुरमा सम्बोधन गर्दै महामन्त्री थापाले विश्वविद्यालयले प्रतिष्ठा गुमेको देख्दा आफूलाई चिन्तित बनाएको बताएका हुन् । 

‘मैले यहीँबाट पढाइ पूरा गरे, सिनेट भएर पनि काम गरेँ । काठमाडौंको वासिन्दा भए पनि स्नातकोत्तर पढ्दा ६ महिना डेरा गरेर बसेको थिएँ, पढ्नको लागि वातावरण बनाउँछ भनेर,’ थापाले भने, ‘धेरैपछि आज विश्वविद्यालयमा भित्रँदै गर्दा यो विश्वविद्यालयको रङ उडेको, नूर गिरेको, मान प्रतिष्ठा गुमाएको जस्तो लाग्यो ।’

नेपालका विश्वविद्यालयको माउ भएकोले नेपालको शिक्षालाई कसरी अगाडि बढाउने भन्ने मामिलामा त्रिविले नेतृत्वदायी भूमिका खेल्नुपर्ने बताए ।