नेकपा (एकीकृत समाजवादी) तनहुँले जिल्लामा मत विश्लेषणको कार्य सुरु गरेको छ । आगामी वैशाख ३० गते हुने स्थानीय तह निर्वाचनका लागि एकीकृत समाजवादीले यथार्थ मत विश्लेषण थालेको हो ।

निर्वाचनको तयारीका लागि दशवटै पालिकाको यथार्थ मत विश्लेषण कार्य थालिएको पार्टीका सचिव श्रीराम कार्कीले जानकारी दिए । सो पार्टीले सत्तारुढ दलबीच गठबन्धन गरेर निर्वाचन जाने सहमतिलाई दिगो र भरपर्दो बनाउनेबारेमा समेत छलफल थालेको छ ।

सो पार्टीले निर्वाचनलाई लक्षित गरी अध्यक्ष शङ्करनारायण श्रेष्ठको अध्यक्षतामा एक हजार एक सदस्यीय निर्वाचन परिचालन कमिटी गठन गरेको छ । नजिकिँदै गरेको स्थानीय तह निर्वाचनलाई लक्षित गरी विभिन्न पार्टीबाट प्रवेश, प्रचार–प्रसारलगायतका कामहरू भइरहेको कार्कीले जानकारी दिए । जिल्लाका १० वटै स्थानीय तहमा निर्वाचन परिचालन कमिटी गठनको काम भइरहेको उनले बताए । 

उक्त पार्टीका अनुसार व्यास नगरपालिकामा ५०१ सदस्यीय निर्वाचन परिचालन कमिटी गठन गरिएको छ । त्यस्तै भानु नगरपालिका, शुक्लागण्डकी नगरपालिका र आँबुखैरेनी गाउँपालिकामा पनि परिचालन कमिटी गठन गरिसकिएको र अन्य पालिकामा बैठक बसेर तयारी थालिएको छ । एकीकृत समाजवादीले विभिन्न वडामा पनि सङ्गठन निर्माणको कामलाई तीव्रता दिएको छ ।