नेकपा एकीकृत समाजवादीले एक हजार १११ सदस्यीय निर्वाचन परिचालन कमिटी गठन गरेको छ ।

शनिवार र आइतवार बसेको उक्त पार्टीको केन्द्रीय सचिवालय बैठकले मूल निर्वाचन परिचालन कमिटी गठन गरेको महासचिव डा. बेदुराम भुसालले जानकारी दिए ।  

पार्टी अध्यक्ष माधवकुमार नेपालको संयोजकत्वमा केन्द्रीय कमिटी, तीनवटै केन्द्रीय आयोग, केन्द्रीय सल्लाहकार परिषद् र केन्द्रीय ज्येष्ठ कम्युनिष्ट मञ्चका सबै पदाधिकारी एवं सदस्यहरू, केन्द्रीय परिषद् सदस्यहरू, प्रदेशका पदाधिकारीहरू, जिल्ला अध्यक्षहरू, जनसंगठनका केन्द्रीय पदाधिकारीहरूसमेत रहेको मूल निर्वाचन परिचालन कमिटी गठन गरिएको भुसालले जानकारी दिए । 

त्यसैगरी, पार्टी महासचिव डा. वेदुराम भुसालको संयोजकत्वमा प्रकाश ज्वाला, डा. गंगालाल तुलाधर, डा. विजय पौडेल, जगन्नाथ खतिवडा, जीवनराम श्रेष्ठ, विश्वनाथ प्याकुरेल, सोमप्रसाद पाण्डे, केदार सञ्जेल, सूर्य खत्री र द्रोणाचार्य क्षेत्री सदस्य रहेको निर्वाचन परिचालन केन्द्रीय सचिवालय पनि एकीकृत समाजवादीले गठन गरेको छ ।

त्यसैगरी, एकीकृत समाजवादीले आगामी स्थानीय निर्वाचनका लागि पार्टीको तर्फबाट उम्मेदवारको सिफारिस एवं छनोटका लागि विभिन्न मापदण्ड तय गरेको छ । जसमध्ये, पार्टी नीति र कार्यक्रमप्रति प्रतिबद्ध रहेको, पार्टीमा योगदान गरेको र विद्रोहमा भूमिका खेलेको, पार्टीप्रतिको निष्ठा र अनुशासनमा दृढ, आर्थिक एवं नैतिक आचरण राम्रो रहेको, जनतामा स्थापित एवं लोकप्रिय हुनुपर्ने मापदण्ड तय गरेको छ । 

त्यसै गरी, स्वच्छ छवि भएको र सुशासनको पक्षपाती, कार्यक्षमता राम्रो भएको र समावेशीतालाई ध्यान दिएर उम्मेदवार चयन गर्नुपर्ने मापदण्ड तय गरेको छ ।