देशको अर्थतन्त्रमा योगदान गर्ने विभिन्न सूचकहरूमध्ये निर्यात बढेको बाहेक कुनै पनि सूचक सकारात्मक देखिएको छैन । 

अर्थमन्त्री जनार्दन शर्माले अर्थतन्त्र सबै ठीकठाक भनेपनि तथ्यांकले भने अर्थतन्त्रका सबैजसो सूचक नकारात्मक रहेको देखाएको छ ।

चालू आर्थिक वर्षको ८ महिनासम्मको सार्वजनिक तथ्यांकअनुसार फागुनसम्ममा निर्यात ८० अर्ब रूपैयाँबाट बढेर १ खर्ब ४७ रूपैयाँ पुगेको छ । अरू सूचकमा साउनदेखि निरन्तर घट्दै गएको रेमिट्यान्स गत वर्षको फागुनको तुलनामा जम्मा ३ प्रतिशतले बढेको छ भने अरू सबै सूचक अर्थतन्त्रका लागि सकारात्मक देखिएका छैनन् । 

चालू आर्थिक वर्षको ८ महिनामा सरकारले गर्ने बजेट खर्च जम्मा ४१ प्रतिशत छ । यस्तो खर्च अहिलेसम्म जम्मा ६ खर्ब ७५ अर्ब रूपैयाँ मात्रै छ । विकास बजेट खर्च गत वर्षको भन्दा ३ प्रतिशत कम छ । ८ महिनाको विकास खर्च जम्मा २० प्रतिशत छ ।

अर्थमन्त्री जनार्दन शर्माले हरेक महिना १० प्रतिशतका दरले खर्च गर्ने भने पनि ८ महिनामा भएको खर्च जम्मा ७७ अर्ब रूपैयाँ मात्रै हो । चालू आवका लागि सरकारले गर्नुपर्ने खर्च पौने ४ खर्ब रूपैयाँको छ । 

मुलुकको व्यापार घाटा करीब १३ खर्ब रूपैयाँ पुग्न लागेको छ । ८ महिनामा देशमा १३ खर्बको आयात भएको देखिए पनि यो आयात बढेर अहिले साढे १४ खर्ब पुगिसकेको छ । 

बैंकिङ प्रणालीमा चालू आवको शुरूदेखि नै लगानीयोग्य अभाव भएकाले बैंकहरूले निक्षेप बढाउन सकेनन् । निक्षेप अपेक्षाकृत ढंगले नबढेको र कर्जा प्रवाह मात्रै भएको हुँदा बैंकिङ प्रणालीमा तरलता अभाव बढेको छ । फागुनसम्ममा वाणिज्य बैंकहरूले जम्मा १ खर्ब ६० अर्ब निक्षेप संकलन गरेर कर्जा प्रवाह भने ५ खर्ब २८ अर्ब रूपैयाँ पुर्‍याएका छन् ।

विदेशी मुद्राको सञ्चिति हरेक महिना घट्दै गएको छ । गत असारमा मात्रै १३ खर्ब ९९ अर्ब रूपैयाँ रहेको विदेशी मुद्राको सञ्चिति घटेर अहिले जम्मा ११ खर्ब ७१ अर्ब रूपैयाँमा सीमित भएको छ ।

गत वर्षको यो अवधिमा सरकारसँग ११.३ महिनाको आयात धान्न पुग्ने रकम थियो भने यो अहिलेको जम्मा ६.७ महिना मात्रै धान्न सक्ने अवस्था रहेको पनि राष्ट्र बैंकले जारी गरेको पछिल्लो तथ्यांकमा उल्लेख छ ।

दुई आर्थिक वर्षको अर्थतन्त्रको चित्र (८ महिनासम्मको)