नेपाली कांग्रेसका नेता डा. शेखर कोइरालाले नयाँ वर्षसँगै मुलुकमा चुनावी माहौल तात्ने बताएका छन् ।

बिहीवार नयाँ वर्ष २०७९ को शुभकामना सन्देश दिँदै डा. कोइरालाले यस वर्ष भरी नै विश्राम गर्ने समय नहुने बताएका छन् ।

उनले शुभकामना सन्देशमा भनेका छन,'नयाँ वर्षसँगै देशमा चुनावी माहौल तात्नेछ । यो वर्षभरि नै हामीलाई विश्राम गर्ने समय हुने छैन । हाम्रो क्रियाशीलतामा मात्र कांग्रेस र लोकतन्त्रको भविष्य सुनिश्चित हुनेछ । नेपाली कांग्रेसका हामी सिपाहीले यो वर्षलाई चुनावी वर्ष" का रूपमा लिनु पर्नेछ ।'

उनले नयाँ वर्षलाई स्वागत गर्दा कांग्रेसलाई तीनै तहको निर्वाचनमा विजयी बनाउने र जनताको मुहारमा खुशी ल्याउनेतर्फ अर्जुनदृष्टि केन्द्रित हुनुपर्ने बताएका छन् ।

'बितेको वर्ष हामी सबैको लागि कष्टकर रह्यो । वैश्यिक स्तरमा फैलिएको कोरोना महामारीले हाम्रो राजनीतिक, सामाजिक र आर्थिक जीवनलाई नकारात्मक प्रभाव पारेको छ । कैयन परिवारले आफन्त गुमाएका छन । मैले पनि मेरो अभिभावक (दाजु) गुमाएँ । कैयन परिवारको आर्थिक अवस्था अस्तव्यस्त भएर तिनमा जीवन देखि निराशा छाएको मैले देखेको छु । उनीहरूमा नवजीवनको धारा बगाउनु छ,' उनले भनेका छन्,'नयाँ वर्षलाई स्वागत गर्दा हाम्रो सङ्कल्प र अर्जुन दृष्टि कांग्रेसलाई तिनै तहको निर्वाचनमा विजयी बनाउने र नेपाली जनताको मुहारमा खुशी ल्याउने तर्फ केन्द्रित हुनुपर्नेछ ।'