गठबन्धन दलबीच प्रतिस्पर्धा हुन सक्छ तर, एमालेसँग तालमेल गर्न पाइँदैन- कांग्रेस प्रवक्ता महत

स्थानीय तहमा गठबन्धनमा रहेका दलहरूबीच सहमति हुन नसकेमा गठबन्धनमा रहेका दलहरूबीच पनि प्रतिस्पर्धा हुन सक्ने कांग्रेसका प्रवक्ता डा. प्रकाशशरण महतले बताएका छन् । 

शनिवार पार्टीको केन्द्रीय कार्यसम्पादन समितिको बैठक भइरहेका बेला पार्टी कार्यालय सानेपामा सञ्चारकर्मीसँग कुरा गर्दै उपमहानगर र महानगरपालिकामा बाहेक अरू स्थानीय तहको उम्मेदवार तल्लो तहमा छलफल गरेर टुंगो लगाउनुपर्ने उनले बताए । 

गठबन्धनमा रहेका एक भन्दा बढी दललाई आफूले जित्छु भन्ने लागेमा मैत्रीपूर्ण प्रतिस्पर्धा हुन सक्ने महतले बताए ।

गठबन्धनमा रहेका दलले मैत्रीपूर्ण प्रतिस्पर्धा गर्दा नेकपा एमालेसँग गठबन्धन भने गर्न नपाउने उनले बताए । 

‘कुनै ठाउँमा सहमति भएन । मेरै शक्ति छ, मेरै जनाधार बढेको छ, विपक्षी दलले जित्दैन भन्ने आयो भने त्यस्तो ठाउँमा फ्रेन्डली प्रतिस्पर्धा पनि हुन सक्छ । तर हामी एक अर्कामा मिलेनौं भनेर एमालेसँग गठबन्धन गर्न पाइँदैन,’ उनले भने । 

गठबन्धनभित्रकै दलका उम्मेदवार निर्वाचित हुने स्थितिमा तालमेल नहुन पनि सक्ने महतको भनाइ छ । ‘जो आए पनि हामी नै आउने हो, एमाले आउने होइन भन्ने भयो भने राम्रै कुरा भयो,’ उनले भने ।

देशभरका ११ उपमहानगरपालिका र ६ महानगरपालिकामा उम्मेदवार छनौटको बारेमा धारणा बनाउन कांग्रेस केन्द्रीय कार्यसम्पादन समितिको बैठक बसिरहेको छ । 

उपहानगरपालिका र महानगरपालिकामा गठबन्धनका दलहरूले छलफल गरेर उम्मेदवार टुंगो लगाउने पाँच दलीय गठबन्धनमा सहमति बनेको छ ।