मतदान स्थलको निगरानी एकै ठाउँबाट

झापामा   स्थानीय   तह   निर्वाचनका   लागि   आवश्यक  तयारी  तीव्र  रूपमा  भइरहेको  र  मतदान  स्थलमा  आवश्यक  न्यूनतम  सुविधाको  व्यवस्थापन  गर्ने काम भएको बताइएको छ ।

झापाको दमकमा संवाद समूह र पत्रकार महासङ्घ झापाले आयोजना गरेको छलफलमा झापाका प्रमुख जिल्ला अधिकारी  छविराज  रिजालले  स्वतन्त्रतापूर्वक  मतदाताले  मतदान स्थलमा गएर आफ्नो मत दिनका लागि आवश्यक सबै प्रकारका सुरक्षा व्यवस्थापन मिलाइने बताए ।

“भयरहित रूपमा निर्वाचन सम्पन्न गराउन हामी लागिपरेका छौँ, यसमा सबैको सहयोग अपरिहार्य छ,” उनले भने । सो अवसरमा जानकारी गराइएअनुसार जिल्लाका  दुई  सय  ८६  मतदान  स्थलमध्ये  ५१  वटा  अतिसंवेदनशील,  एक  सय  ५३  वटा  संवेदनशील  र  ८२  वटा  सामान्य  भनेर  वर्गीकरण  गरिसकिएको  छ  ।  

निर्वाचनको समयमा सबै सुरक्षा अङ्गसहित करिब तीन हजार म्यादी प्रहरी परिचालित हुने जनाइएको छ ।

जिल्ला निर्वाचन कार्यालयका प्रमुख तुलसी नेपालले दिनुभएको जानकारीअनुसार जिल्लामा छ लाख ४६ हजार २३४ जना मतदाता छन् ।

जिल्लामा महिला मतदाताको सङ्ख्या धेरै छ । तीन लाख २४ हजार ७०५ महिला र तीन लाख २१ हजार ५२० जना पुरुष मतदाता छन् । अन्यमा नौ जना मतदाता रहेका छन् ।

मतदान स्थलमा खानेपानी र शौचालयको प्रबन्ध मिलाइसकिएको पनि नेपालले जानकारी दिए । ज्येष्ठ नागरिकका लागि विश्राम स्थलको कहीँकहीँ व्यवस्थापन गर्न भने बाँकी रहेको उनको भनाइ थियो ।

यसैबीच, जिल्लाका १५ वटा स्थानीय तह सबैको एकै  ठाउँमा  बसेर  मतगणना  स्थलको  अवस्था  बुझ्न  सकिने गरी सीसीटीभी जडान भएको छ ।

सबै स्थानीय तहमा  के  भइरहेको  छ  भन्ने  सम्बन्धित  सरोकारवाला  निकायका प्रमुख तथा प्रतिनिधिले हेर्न सकिने व्यवस्थापन जिल्लामा मिलाइएको हो ।

संवाद समूह र पत्रकार महासङ्घले सञ्चारकर्मीसँग आइतबार बिर्तामोड र सोमबार दमकमा गरेर दुुई दिन अन्तक्र्रिया एवं छलफलको आयोजना गरिएको पत्रकार महासङ्घ झापाका अध्यक्ष एकराज गिरीले बताए ।  गोरखापत्र दैनिकमा विष्णुप्रसाद पोखरेलले खबर लेखेकी छन् ।