सत्तारूढ ५ दलले स्थानीय तह निर्वाचनका लागि ६ महानगरपालिका र ११ उपमहानगरपालिकाको मेयर र उपमेयर पद भागबण्डा गरेका छन् ।

बुधवार प्रधानमन्त्रीको सरकारी निवास बालुवाटारमा बसेको नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाले वैशाख ३० गते हुने स्थानीय तहको निर्वाचनका लागि महानगर र उपमहानगरतर्फको मेयर र उपमेयरको सिटमा भागबण्डा गरेका हुन् ।

गठबन्धनका तर्फबाट साझा उम्मेवार उठाउने गरी ६ महानगर र ११ उपमहानगरको मेयर र उपमेयरमा भागबण्डाको लिखित सहमति भएको कांग्रेस नेता रामचन्द्र पौडेलले जानकारी दिए ।

जसअनुसार कांग्रेसले विराटनगर, काठमाडौं र ललितपुरको मेयर तथा वीरगञ्ज, भरतपुर र पोखरा महानगरपालिकाको उपमेयर पद पाएको छ ।

नेकपा माओवादी केन्द्रले भरतपुर महानगरपालिकाको मेयर र ललितपुरको उपमेयर भाग पाएको छ भने नेकपा एकीकृत समाजवादीले पोखरा महानगरपालिकाको मेयर र काठमाडौं महानगरपालिकाको उपमेयर पाएको छ । 

जनता समाजवादी पार्टीले वीरगञ्जको मेयर र विराटनगरको उपमेयर पाएको छ ।

११ उपमहानगरपालिकाको भागबण्डा गर्दा कांग्रेसले धरान, इटहरी, कलैया, बुटवल, तुलसीपुर, नेपालगञ्ज, धनगढी गरी ७ उपमहानगरको मेयर पद पाएको छ भने जितपुर सिमरा, घोराही र हेटौंडा गरी ३ उपमहानगरको उपमेयर कांग्रेसको भागमा परेको छ ।

माओवादी केन्द्रले जितपुर सिमरा र घोराही उपमहानगरपालिकाको मेयर पद भाग पाउँदा धरान र धनगढीको उपमेयर पाएको छ ।

नेकपा एकीकृत समाजवादीले हेटौंडा उपमहानगरपालिकाको मेयर पद पाउँदा इटहरी, बुटवल र तुलसीपुरको उपमेयर पाएको छ । जसपाको भागमा जनकपुर उपमहानगरपालिकाको मेयर र कलैया र नेपालगन्जको उपमेयर परेको छ ।

सत्तारूढ गठबन्धनको आइतवारदेखि भागबण्डाको बैठक नेपालगञ्ज उपमहानगरपालिकाको मेयरको भागबण्डा नमिल्दा मंगलवार राति २ बजेसम्म बसेको बैठकमा सहमति भएको थिएन ।

बुधवार बसेको सत्तारूढ दलको शीर्ष नेताको बैठकले नेपालगञ्जको मेयरको उम्मेदवार नेपाली कांग्रेसले पाउने गरी सहमति जुटाएको छ । जनकपुरमा जसपालाई दिएपछि गठबन्धनमा उपमहानगरतर्फको भागबण्डा मिलेको हो ।

देशभरका ६ महानगर र ११ उपमहानगरको मेयर र उपमेयरको भागबण्डाको अवस्था हेर्दा गठबन्धनमा कांग्रेस बढी नाफामा देखिएको छ । २०७४ सालको स्थानीय तह निर्वाचनमा कांग्रेसले २ वटा मात्रै महानगरपालिकाको नेतृत्व हात पारेको थियो । त्यसबखत ६ महानगरपालिकामध्ये ललितपुर र विराटनगरको प्रमुख कंग्रेसले जितेको थियो ।

तर अहिले कांग्रेसले गठबन्धनको भागबण्डामा काठमाडौंसहित ३ वटा महानगरपालिकामा मेयरको टिकट आफ्नो पोल्टामा पारेको हो । कांग्रेसले काठमाडौं, ललितपुर र विराटनगरको मेयर पद लिएको हो । २०७४ सालमा नेकपा एमालेले जितेको पोखरा महानगरपालिकाको उपमेयरको टिकट पनि कांग्रेसले नै पाउने भएको छ ।

यसैगरी ७ वटा उपमहानगरपालिकाको प्रमुख पदको टिकट पनि कांग्रेसको भागमा परेको छ । यीमध्ये ३ वटा उपमहानगरमा कांग्रेसले अघिल्लो निर्वाचनमा जितेको थियो । त्यसमा ४ वटा थप गर्दै कांग्रेसले ७ वटा महानगरको टिकट आफ्नो भागमा पारेको हो ।

२०७४ सालमा धरान, धनगढी र कलैया उपमहानगरपालिकाको मेयर पद कांग्रेसले जितेको थियो । हाल इटहरी, बुटवल, तुलसीपुर र नेपालगञ्ज महानगरपालिकाको मेयरको उम्मेदवारी कांग्रेसले पाएको छ । राजधानीमा खबर छ ।