ओलीप्रति गगन थापाको कटाक्ष- जसको मुखमा अँगार छ, उसले ओकल्ने कालै हो

नेपाली कांग्रेसका महामन्त्री गगन थापाले एमाले अध्यक्ष केपी ओलीले मुख छाड्नु कुनै नौलो कुरा नभएको बताएका छन् । 

बुधवार काठमाडौंमा आयोजित एक कार्यक्रममा बोल्दै उनले भने, ‘जसको मुखमा अँगार छ, उसले ओकल्नै कालै हो, यो कुनै नयाँ कुरा भएन ।’

मंगलवार एमाले अध्यक्ष ओलीले कांग्रेसको घोषणापत्र विचार शून्य गाली पुराण भएको र पागलहरूको प्रलाप भनेर टिप्पणी गरेका थिए ।

महामन्त्री थापाले ओलीले आफ्नो झुटलाई चुनौती दिने व्यक्तिहरूलाई ‘पागल’ भन्ने गरेको आरोप समेत लगाए । 

‘तपाईंलाई थाहा छ उहाँले पागल कसलाई भन्नुहुन्छ ? जसले उहाँको झुटलाई च्यालेन्ज गर्छ,’ उनले भने, ‘पहिले सुशीला कार्की, गोविन्द केसीलाई पागल भन्नुभयो । कुण्ठाको अभिव्यक्ति दिएर समर्थकहरू खित्का छाडेर हाँसेपछि भरपेट खाएर सुत्ने केपी ओली हो ।’

साथै उनले ओलीलाई रिस उठ्यो भन्दैमा सत्य बोल्न नछाड्ने बताए । ‘ओलीलाई प्रशंसाको एकालाप सुन्ने बानी परेको छ, घोषणापत्रमा पर्दाफास गरेको कुरा सहने कुरै भएन,’ उनले भने, ‘बुढाबा सनक्क सन्किँदै गर्दा कहिलेकाहीँ शरीरलाई अप्ठ्यारो पर्न सक्छ, ख्याल गर्नुहोला ।’