नेपाली कांग्रेसका महामन्त्री गगनकुमार थापाले विगत पाँच वर्षको अवधिमा काठमाडौं महानगरपालिकाको मेयरले गरेको कामको जवाफ दिनुपर्ने बताएका छन् । 

बिहीवार नेपाली कांग्रेस काठमाडौं महानगर समितिले आयोजना गरेको क्रियाशिल कार्यकर्ता भेलालाई सम्बोधन गर्दै महामन्त्री थापाले विगत पाँच वर्षको अवधिमा काठमाडौं महानगरपालिकाको मेयरले गरेको कामको बारेमा जनतालाई जवाफ दिनुपर्ने बताएका हुन् । 

चुनावको बेलामा गरिएको प्रतिबद्धता अनुसार काठमाडौंमा कति सफा भयो ? काठमाडौं कति सहज भयो ? यसको उत्तर महानगरबासीलाई दिनुपर्ने उनले बताए । 

उनले भने,‘घरदैलोमा जाँदै गर्दा होस् । टोलमा जाँदै गर्दा होस् । यो बेलामा यो पाँच वर्ष जुन खेर गएको छ, यो खेर गएको वर्षको जिम्मा कसले लिने भन्ने बहस कांग्रेसका साथीहरुले तल गर्नैपर्छ । कसै न कसैले जिम्मा लिनै पर्छ । जिम्मा लिने अवस्था आएन भने जवाफदेहिताको राजनीति रहँदैन भन्ने कुरा हामीले तल भन्नुपर्छ ।'

महामन्त्री थापाले केही पार्टीका नेता तथा उम्मेदवारहरुले महिलामाथि अपमान गरेको बताए । 

उनले महिला हुनुलाई नै अयोग्यताको रुपमा हेर्नेहरूलाई काठमाडौंका महिलाहरूले चुनावमार्फत उत्तर दिनुपर्ने पनि बताए ।  

उनले नेकपा(एमाले)ले स्थानीय तह निर्वाचनमा जो भेट्यो त्यहीसँग तालमेल र गठबन्धन गरिरहेको बताए ।

उनले एमालेले एउटा वडामा हिन्दु धर्मको वकालत गर्ने कमल थापाको पार्टीसँग र अर्को वडामा क्रिश्चियन धर्मको वकालत गर्ने परिवार दलसँगसमेत तालमेल गरेको टिप्पणी गरे ।