नेपाली कांग्रेसका सभापति एवं प्रधानमन्त्री शेरबहादुर देउवाले सत्ता गठबन्धनलाई भविष्यसम्म लैजान भरतपुरमा मेयरकी उम्मेदवार रेणु दाहाललाई जिताउन कांग्रेस कार्यकर्ताहरूलाई निर्देशन दिएका छन् । 

गठबन्धनकै कारण आफू प्रधानमन्त्री बनेको र गठबन्धन मन पराएकाले पार्टीमा ८२ प्रतिशत सदस्य जितेको पनि उनले दावी गरे । 

चितवनको भरतपुरमा बिहीवार आयोजित चुनावी सभालाई सम्बोधन गर्दै देउवाले रेणुले राम्रो काम गरेकाले पनि उनलाई जिताउनु परेको बताएका हुन् ।

‘बेरुजु नभएको महानगरको मेयर हो, धेरै मेयरमध्ये एक होला यस्तो । काम पनि गर्नुभएको छ, जग्गाको भाउ बढिसक्यो । यस्तो काम गर्ने मान्छे नभए अरू को हुने त ? यस्तो राम्रो काम गर्नेलाई हराएमा भरतपुरका जनताले के भन्लान् ?’ देउवाले भने । 

गठबन्धन टुटाउने षडयन्त्र भइरहेको भन्दै देउवाले गठबन्धन टुट्दा कांग्रेसलाई घाटा पुग्ने बताए ।

‘अघि एकजना साथीले हाम्रो सभापति सोझो भन्नुभयो । म सोझोलाई नै बनाउनु भयो प्रधानमन्त्री, तपाईंहरूले बुझ्नुपर्यो,’ देउवाले भने । 

देउवाले माओवादी केन्द्रका अध्यक्ष पुष्पकमल दाहाल ‘प्रचण्ड’ सजिलो मान्छे भएको टिप्पणी गरे ।  

‘गठबन्धनलाई बलियो बनाएर १०/२० वर्ष गठबन्धन चल्छ । उहाँले जितिसक्नुभएको छ, पार्टीले तालमेलको बर्खिलाप गर्नुपर्ने छैन,’ देउवाले भने ।