नेपाली कांग्रेसका प्रवक्ता डा. प्रकाशशरण महतले चुनावमा नेपाली कांग्रेसको सरकार आएपछि ६५ वर्ष पुगेका ज्येष्ठ नागरिकलाई वृद्धभत्ता कार्यान्वयनमा ल्याउने बताएका छन् । २०७४ सालमा शेरबहादुर देउवा नेतृत्वको चुनावी सरकारले वृद्धभत्ताको अवधि ७० बाट ६५ मा झार्ने निर्णय गरेको थियो । 

त्यो बेला मन्त्रिपरिषदबाट निर्णय नगराई घोषणा गरिएकोलोकान्तरले त्यो बेला खुलासा गरेको थियो । सोमवार पार्टी केन्द्रीय कार्यालयमा आयोजित पत्रकार सम्मेलनमा कांग्रेस प्रवक्ता महतले कांग्रेसको सरकार आएपछि ६५ वर्षमा वृद्धभत्ता दिने निर्णय कार्यान्वयनमा ल्याउने बताएका हुन् । कांग्रेसको सरकार बहाल रहे पनि महतले कांग्रेसको सरकार आएपछि ६५ वर्षमा वृद्धभत्ता दिने बताएका हुन् । 

‘६५ वर्षदेखि नै वृद्धभत्ता दिने निर्णय गरेका थियौँ, अहिले नेपालीको ७१ वर्षको सरदर आयु पुगेको छ । जो हुने खाने वर्गमा छन्, उनीहरू ८०/८५ पुग्छन् । विपन्नको सरदर आयु ७० वर्ष पनि छैन । त्यो अवस्थामा त्यो वर्ग वृद्धभत्ताबाट वञ्चित छ,’ महतले भने, ‘६५ वर्षदेखि नै वृद्धभत्ता दिने अठोट छ सरकार आएपछि कार्यान्वयन गर्छौं ।’